Расейскія дальнабойнікі: Пустыя паліцы ў крамах прымусяць уладу пачаць перамовы

Праз забастоўку кіроўцаў у РФ пачаліся перабоі з пастаўкамі прадуктаў у рэгіёны.

Паводле інфармацыі Таварыства абароны правоў спажыўцоў, мацней за ўсё пакутуюць паўночныя рэгіёны, Урал і Сібір.

«Шмат хто кажа, што ўсюды ўсяго хапае. Людцы, усё гэта не так – наша ўлада спрабуе і імкнецца зрабіць усё, каб для людзей гэта было не моцна паказана, што мы стаім», – кажа адзін з дальнабойнікаў у Іркуцку.

На чарговым сходзе ў лагеры страйкоўцаў у Іркуцку каардынатар Сяргей Хмялёў агучвае навіны: у крамах перабоі з прадуктамі. А значыць, стачка блізкая да мэты. І трэба стаяць яшчэ. Пустыя паліцы ў крамах вымусяць улады нарэшце пайсці з імі на дыялог.

На іркуцкіх базах, кажуць прадаўцы, перабоі ў першую чаргу з пастаўкай гародніны.

«Складана, вядома, цяпер, але стараемся падтрымліваць асартымент невялікімі партыямі, самі возяць, адзінкава нешта», – распавялі «Настоящему Времени».

– Што падаражэла праз забастоўку?

– У сярэднім на 20 рублёў.

– А што?

– Памідоры, агуркі.

– Адкуль вам іх вязуць?

– Тут з кітайскіх базаў.

Пакупнікі рост коштаў заўважылі, але шмат хто гатовы пацярпець у падтрымку дальнабойнікаў.

«Я іх нават падтрымліваю, у прынцыпе, за што на дарогах грошы яшчэ браць, калі падатак чалавек і так плаціць», – кажа мясцовы жыхар.

Таварыства абароны правоў спажыўцоў у пачатку тыдня апублікавала звесткі: у краіне, паводле іхніх звестак, перабоі з прадуктамі. Можна паглядзець на карце – ад Дагестана да Хабараўскага краю. А гэта значыць, харчовая бяспека краіны пад пагрозай. Арганізацыя афіцыйна паведаміла пра гэта Дзмітрыю Мядзведзеву і папрасіла звярнуць увагу на стачку і апублікаваць інфармацыю пра страйк, каб людзі паспелі закупіцца прадуктамі на запас.

Зрэшты, урад маўчыць з адказам. Буйныя гандлёвыя сеткі тым часам запэўніваюць, у іх перабояў у пастаўках не будзе. Незалежна ад рэгіёна. У рытэйлераў у асноўным наладжаная свая лагістыка.

«Не буду хітраваць, у сувязі са складанай абстаноўкай на транспартным рынку мы асцерагаліся што альбо пойдуць кошты ўгору, альбо меншы будзе выбар, але паколькі мы працуем са сваёй лагістыкай, у нам атрымалася гэтага пазбегнуць», – кажа Барыс Малышаў, PR-мэнэджар сеткі гастраномаў у Краснаярску.

Так што яны цалкам могуць стаць манапалістамі рынку на нейкі час. Таму што стачка мацней за ўсё адбілася на дробных прадпрымальніках і іх кліентах.

«Многае падаражэла. Самае большае – агуркі, гародніна, таму што вясна – добрай гародніны няма ўжо. Даводзіцца шукаць усюды, цяжка цяпер з таварам, вельмі мала прывозу. Гэта вельмі дрэнна, таму што краму пустой не пакінеш, трэба тавар дзесьці даставаць. Даводзіцца шукаць доўга, цяжка вельмі», – кажа гаспадыня гандлёвай кропкі Мехпара Рагімава.

Дальнабойнікі ў сваю чаргу абяцаюць стаяць да канца. Яны спрабуюць схіліць на свой бок працоўных калег і спадзяюцца, што ўлады ўсё ж такі звернуць на іх увагу. Хоць трымаць страйк становіцца ўсё больш складана.

«Калі б я быў без дзяцей, без усяго, я ўжо згодны быў бы ўцячы ў іншую краіну. Мы абарону ўсе падымаем, а ў нас цяпер на паесці няма грошай у кіроўцаў. Ды кожны з нас, каб не дзеці, з'ехаў бы за кардон, дзе ўсе паказваюць на іх законы, а ў нас не атрымліваецца іх ужываць – у нас краіна ад аднаго канца да другога 22 тысячы кіламетраў», – кажа адзін з кіроўцаў.