Лукашэнка – кіраўніку Міністэрства гандлю: Кантраляваць цэны! МВФ вам не ўказ

Дыктатар папярэдзіў, што ніякай «лібералізацыі» ў эканоміцы не будзе.

Пра гэта Лукашэнка заявіў у «пасланні да народа і парламента». Сайт Charter97.org вёў тэкставую онлайн-трансляцыю выступу.

«Кантраляваць цэны павінны ўсе, каб не дапусціць іх неабгрунтаванага росту. Тым больш працуе спецыяльная «гарачая лінія» ў гэтых пытаннях», — запатрабаваў дыктатар.

— Вы ведаеце, што мяне насцярожвае. Нядаўна наш міністр гандлю (міністр антыманапольнага рэгулявання і гандлю Уладзімір Калтовіч. — Заўв. рэд.), якому была пастаўлена дакладная задача, адышоўшы ад гэтай задачы, заявіў: «Ведаеце, мы не будзем, напэўна, кантраляваць цэны, мы будзем больш арыентавацца на развіццё канкурэнцыі». Можа, я дрэнна пачуў ці не зразумеў чагосьці... Паўтараю вам публічна: ваша задача — кантроль за цэнаўтварэннем, як калісьці вы пачалі рабіць. І ніякія рэфарматары і МВФ вам не ўказ. Запомніце гэта. Кантралюйце цэнаўтварэнне!

У якасці прыкладу Лукашэнка прывёў цэны на цукар, якія падскочылі на 25%. Перапрацоўшчыкі і вытворцы буракоў нядрэнна зарабляюць, чаму так падскочылі цэны, здзіўляецца дыктатар. «А вы кажаце пра нейкую канкурэнцыю. Адзін цукровы завод будзе канкураваць з другім, трэцім, і мы атрымаем нейкі эфект. Ілюзія!» — упэўнены Лукашэнка.

«Рабіце так, як вы ўмееце, і не слухайце нікога, хто будзе пераконваць у нейкай лібералізацыі. Лібералізацыя добрая для таго, хто сёння не мае праблем і ў каго ў кішэні добрыя грошы. А ў нас мільёны людзей, якія сёння шмат грошай не маюць», — рэзюмаваў Лукашэнка.