Палітолаг: Лукашэнка атрымаў цяжкую маральную і псіхалагічную траўму
20- 22.04.2017, 12:55
- 21,845
Выступ дыктатара ў «палатцы» агаліў новыя прыкметы крызісу «беларускай мадэлі».
Пра гэта «Радыё Свабода» заявіў палітолаг Валер Карбалевіч:
- Цяперашняе «прэзідэнцкае пасланне», у адрозненне ад папярэдніх, праходзіла на зусім новым гістарычным і сацыяльна-палітычным фоне. З'явілася новая прыкмета крызісу беларускай мадэлі. Эканамічны крызіс перарос у сацыяльны, тысячы людзей ва ўсёй краіне выйшлі на вуліцы выказаць пратэст.
І гэта стала адлюстраваннем непрымання большасцю насельніцтва сацыяльна-палітычнага статус-кво. Аляксандр Лукашэнка атрымаў цяжкую маральную і псіхалагічную траўму. Давялося ўжываць грубую сілу, каб нейтралізаваць пратэсты ягонага ўласнага электарату.
І вось, ледзь акрыяўшы ад шоку, дыктатар выйшаў на трыбуну. Можна было чакаць, што ён адыдзе ад звыклай схемы паслання, наважыцца на шчырую размову з народам, скажа, што «я ведаю выхад з таго цяжкага становішча, у якое патрапілі ўсе мы, ідзіце за мной, я прапаную сур'ёзныя змены ў сваёй палітыцы». Але нічога гэтага не пачулі.
Народныя пратэсты апошнія два месяцы былі галоўнай падзеяй у краіне. За імі сачыла большасць насельніцтва. Яны моцна палітызавалі грамадства, разбудзілі насельніцтва. Лагічна было б чакаць, што гэта і стане галоўным пытаннем паслання.
Але пра вулічныя акцыі Аляксандр Лукашэнка згадаў толькі ў тым кантэксце, што іх і далей будуць жорстка душыць незалежна ад таго, як на гэта рэагуе Еўразвяз. Будуць прадаўжацца рэпрэсіі і супраць СМІ, якія іх асвятляюць.
Хоць скорагаворкай Лукашэнка прызнаў, што «мы знаходзімся каля небяспечнай рысы, не зробім паўкроку наперад, баюся казаць, што адбудзецца». Незразумела толькі, хто вінаваты ў гэтым. Калі казаць пра тое, што ж прапануе дыктатар у сэнсе выхаду з крызісу, акрамя таго каб біць дубінкай усіх па галаве, то нас чакала расчараванне.