У Магілёве таксама аблілі чырвонай фарбай помнік Леніну
25- 22.04.2017, 13:42
- 29,525
Акрамя таго, на помніку невядомыя пакінулі шматзначны надпіс.
У Магілёве ў ноч з 21 на 22 траўня помнік Леніну аблілі чырвонай фарбай і пакінулі надпіс па-расейску: «Забойца мільёнаў людзей».
Як паведамляе «Радыё Свабода», пра гэта стала вядома з публікацыі ў групе «Магілёў real», што ў сацыяльнай сетцы «Вконтакте».
Помнік размяшчаецца каля Дома культуры завода імя Кірава. З аповедаў мясцовых жыхароў, раніцай 22 красавіка раён Дома культуры быў ачэплены.
Міліцыянты апыталі жыхароў прылеглых дамоў. «У помнік кідалі шкляныя ёмістасці з фарбай. Яны разбіваліся і пакідалі чырвоныя плямы на помніку», - сказаў адзін з жыхароў мікрараёна.
Да 12 гадзін сённяшняга дня помнік пафарбавалі. Сляды чырвонай фарбы з бітым шклом засталіся толькі пад помнікам. Каб зафарбаваць помнік, выклікалі спецтэхніку з вышкай.
Нагадаем, што ў ноч на 21 красавіка чырвонай фарбай аблілі помнік Леніну ў Берасці. Невядомых, якія гэта зрабілі, шукалі з сабакамі.
А ў канцы сакавіка чырвонай фарбай быў абліты помнік Леніну ў Браславе.