Расеец хацеў падарваць футбалістаў «Барусіі» дзеля гульні на біржы

Выхадзец з Расеі падазраецца ў спробе зарабіць на абрынанні акцый футбольнага клуба.

Выбухі ля аўтобуса каманды з Дортмунда былі зладжаныя для гульні на паніжэнне. Выхадзец з Расеі Сяргей. В. падазраецца ў спробе зарабіць на абвале акцый футбольнага клуба, паведамляе DW.

Расеец хацеў забіць футбалістаў «Барусіі» дзеля некалькіх сотняў тысяч еўраў.

Тры начыненыя металічнымі штыфтамі бомбы былі ўзарваныя 11 красавіка ў Дортмундзе побач з аўтобусам футбольнага клуба «Барусія» дзеля біржавой гульні на паніжэнне. Да такой высновы прыйшлі следчыя органы Нямеччыны - і ўранку 21 красавіка арыштавалі ў раёне Цюбінгена выхадца з Расеі Сяргея В. 28-гадовы электратэхнік, які мае, паводле звестак нямецкіх СМІ, грамадзянства РФ і ФРГ, абвінавачваецца ў спробе забойства ў 20 выпадках з карыслівых падахвочванняў.

Такога злачынства ў крымінальнай гісторыі Нямеччыны яшчэ не было. Разнастайныя спробы маніпуляваць курсамі акцый робяцца рэгулярна, але на свядомае масавае забойства дзеля біржавой гульні тут яшчэ ніколі не ішлі. Мэта падазраванага магла палягаць толькі ў тым, каб скалечыць ці забіць як мага больш гульцоў дортмундскай «Барусіі»: толькі ў такім выпадку спрацавала б прыдуманая ім схема імклівага ўзбагачэння.

Яе сутнасць: гулец робіць стаўку на падзенне курсаў каштоўных папер. Гэта шырока распаўсюджаны і абсалютна легальны тып біржавой дзейнасці, якім займаецца мноства спекулянтаў ва ўсім свеце. Іх звычайна называюць мядзведзямі або шарцістамі. Яны могуць дзейнічаць двума шляхамі. Прафесіяналы нярэдка «прадаюць у шорт» узятыя напракат акцыі ў надзеі пасля абвалу курсу выкупіць іх назад больш нізкім коштам.

У Нямеччыне спекулянтам-аматарам гэты спосаб, як правіла, недаступны. Затое яны маюць найшырэйшы выбар так званых дэрыватываў, якія выпускаюцца разнастайнымі фінансавымі інстытутамі і могуць быць набытыя кліентам кожнага інтэрнэт-банка.

Набываючы такія дэрыватыўныя інструменты, як апцыённыя сертыфікаты, спекулянт фактычна ўкладае з эмітэнтам заклад пра тое, у якім кірунку і як далёка рушыць курс пэўнай паперы. Калі ён правільна прадбачыў рост або зніжэнне, то кошт дэрыватыву можа вырасці не толькі ў разы, але і ў дзясяткі, часам нават у сотні разоў. Усё залежыць ад вышыні ўзлёту або глыбіні падзення, ад яго хуткасці і цэлага шэрагу іншых фактараў.

Менавіта да гэтага інструмента і звярнуўся Сяргей В. Паводле звестак следства, ён тройчы набываў пакеты апцыйных сертыфікатаў на падзенне курсу акцый «Барусіі», апошні - у дзень выбуху. Разлік палягаў у тым, каб з дапамогай трох бомбаў вывесці з ладу ўсю каманду і асабліва яе зорак, што надоўга пазбавіла б клуб крыніцы высокіх даходаў.

Такая перспектыва на наступны ж біржавы дзень немінуча адрэагавала б абвалам акцый і імклівым падаражаннем дэрыватываў на іх падзенне. Сваёй ахвярай зламыснік абраў дортмундскую каманду толькі таму, што «Барусія» - адзіны нямецкі футбольны клуб, які з'яўляецца адкрытым акцыянерным таварыствам, якое размясціла на біржы свае паперы. Для абранай Сяргеем В. злачыннай схемы ў Нямеччыне проста не было іншых кандыдатаў.

Апошнюю рату апцыйных сертыфікатаў на падзенне акцый «Барусіі» зламыснік купіў, седзячы ў дортмундскім гатэлі «L`Arrivée» ў нумары з выглядам на будучае месца злачынства ў чаканні, калі каманда адправіцца з гэтага гатэля на першы матч ¼ фіналу Лігі чэмпіёнаў супраць клуба «Манака». Прычым куплю ён здзейсніў онлайн з гасцінічнага IP-адраса, пакінуўшы тым самым следству вельмі добры след.

Але гэта - не адзіны прыклад яго дылетантызму і нават наіўнасці, асабліва ў фінансавай сферы. Сяргей В. наважыў укласці ўгоду свайго жыцця менавіта ў той вобласці, у якой усе апошнія гады рабіўся больш жорсткім кантроль і нагляд за трансакцыямі, якія да таго ж ажыццяўляюцца амаль выключна электронным спосабам, а таму пакідаюць шматлікія сляды.

Да ўсяго іншага ён выбраў не вельмі запатрабаваныя дэрыватывы на не вельмі актыўна таргаваную акцыю. Ён, відавочна, не думаў аб тым, што раптоўны ўсплёск попыту на мала ліквідныя паперы абавязкова прыцягне да сябе ўвагу. Так яно і адбылося. Выконваючы патрабаванні закона аб барацьбе з адмываннем грошай, банк, праз які падазраваны набываў апцыёны, адразу ж паведаміў наглядным органам аб незвычайным руху сродкаў.

Менавіта гэта, паводле зробленай 21 красавіка заявы Федэральнай пракуратуры Нямеччыны, і вывела следства на падазраванага. Аднак Сяргея В. яшчэ каля тыдня «вялі», збіраючы довады і правяраючы версіі аб магчымых суўдзельніках. На гэты момант праваахоўныя органы афіцыйна зыходзяць з таго, што іх не было.

Так які ж куш збіраўся сарваць бамбіст? Маючы абмежаваныя ўласныя сродкі для спекулятыўнай гульні, ён узяў 3 красавіка ў банку спажывецкі крэдыт. У нямецкіх СМІ называецца сума 40 тысяч еўраў. Усяго ж ён нібыта выдаткаваў на куплю апцыёну 78 тысяч еўраў. Пацверджання гэтай лічбе няма.

Некалькі разоў апцыённыя сертыфікаты DZ Bank на падзенне акцый «Барусіі» тэрмінам дзеяння да 16 чэрвеня 2017 года, што таргаваліся на біржы 11 красавіка, маглі, да прыкладу, пры зніжэнні курсу на 20 адсоткаў тэарэтычна вырасці ў кошце ў 8 разоў. У такім выпадку укладзеныя 78 тысяч маглі б даць прыбытак прыкладна 550 тысяч. Пры абвале курсу напалову і больш, гаворка магла б ісці пра мільён еўраў. Жоўтая газета Bild называе ў якасці максімальна магчымай сумы нават 3,9 мільёна еўра, аднак яна ўяўляецца моцна завышанай.

Федэральная пракуратура заявіла 11 красавіка, што пакуль не падлічыла тэарэтычна магчымы выйгрыш меркаванага злачынцы. Калі ж Сяргей В. выдаткаваў на апцыёны не 78, а 40 тысяч ці нават менш, то нарэшце можа выявіцца, што ён быў гатовы забіць 20 чалавек дзеля некалькіх сотняў тысяч, а то і ўсяго некалькіх дзясяткаў тысяч еўраў. Партал spiegel.de сцвярджае, што злачынец «збіраўся, відаць, зарабіць звыш 100 тысяч еўраў прыбытку».

Напраўду ён, відавочна, не зарабіў нічога. Акрамя, трэба меркаваць, вялікага турэмнага тэрміну, які вызначыць суд. Акцыі ж «Барусіі» ў дзень пасля выбухаў упалі толькі прыкладна на 5 адсоткаў, што наўрад ці вывела апцыён пакупніка пасля выплаты камісійных у прыкметны плюс. І калі ён адразу ж ад іх не пазбавіўся, то цяпер імкліва губляе ўкладзеныя грошы, бо тэрмін дзеяння дэрыватываў з кожным днём скарачаецца, а акцыі клуба на навінах аб затрыманні падазраванага растуць.