Амерыканскаму нафтаваму гіганту забаранілі працаваць з расейскай кампаніяй

Пастанова прынятая Мінфінам ЗША пасля кансультацый з прэзідэнтам Дональдам Трампам.

Міністэрства фінансаў ЗША абвясціла аб тым, што не будзе рабіць вынятак для кампаніі Exxon, што папрасіла часова скасаваць санкцыі, якія забараняюць рэалізацыю супольных праектаў з расейскай карпарацыяй «Раснафта», паведамляе golos-ameriki.ru.

«Пасля кансультацый з прэзідэнтам Дональдам Трампам, міністэрства фінансаў не будзе даваць часовы дазвол для амерыканскіх кампаній, у тым ліку Exxon, на вядзенне буравых работ, забароненых санкцыямі, якія дзейнічаюць у дачыненні да Расеі», – гаворыцца ў заяве кіраўніка мінфіна Стывена Мнучына.

Нагадаем – на гэтым тыдні нафтавы гігант Exxon Mobil звярнуўся да адміністрацыі Дональда Трампа з просьбай зрабіць для яго выключэнне з рэжыму санкцый супраць Расеі, дазволіўшы кампаніі аднавіць бурэнне ў раёне Чорнага мора з расейскім партнёрам.

Угода з «Раснафтай» была ўкладзеная цяперашнім дзяржсакратаром ЗША Рэксам Тылерсанам пяць гадоў таму ў выніку наўпроставых перамоў з расейскімі афіцыйнымі асобамі, уключаючы прэзідэнта Уладзіміра Пуціна. Амерыканская нафтавая кампанія таксама выказала гатоўнасць ўдзельнічаць у выведцы сланцавай нафты ў Заходняй Сібіры і глыбакаводных радовішчаў у Чорным моры.

«Раснафта» і Exxon тады прыступілі да бурэння ў Карскім моры ў Арктыцы, але працы былі прыпыненыя пасля таго, як у 2014 годзе былы прэзідэнт Барак Абама ўвёў санкцыі супраць Расеі ў сувязі з анэксіяй Крыму.

Паводле ацэнак Exxon у 2015 годзе, патэнцыйныя страты праз адмову ад рэалізацыі супольнага праекта з «Раснафтай» могуць скласці 1 мільярд даляраў.

Будучы кіраўніком нафтавай кампаніі, Рэкс Тылерсан у 2014 годзе выступаў супраць санкцый, заяўляючы, што такая тактыка можа мець «вельмі вялікую пабочную шкоду».

Бізнэсовец падаў у адстаўку з пасады кіраўніка Exxon, калі стала вядома, што Трамп мае намер прапанаваць ягоную кандыдатуру на пасаду дзяржсакратара. Пазней прадстаўнік Дзярждэпартамэнту паведаміў, што Тылерсан абяцаў самаўхіляюцца ад умяшання ў якія-небудзь пытанні, якія тычацца Exxon, цягам двух гадоў пасля прызначэння на пасаду кіраўніка амерыканскай дыпламатыі, і не ўмешвацца ў прыняцце ўрадавымі ўстановамі ўсялякіх пастаноў у дачыненні да нафтавай кампаніі.