Піўзавод «Крыніца» рыхтуюць да прыватызацыі

Хто можа быць у ліку пакупнікоў?

Еўрапейскі банк рэканструкцыі і развіцця (ЕБРР) займаецца перадпрыватызацыйнай падрыхтоўкай менскага піўзавода «Крыніца». Аднак пра прыход стратэгічнага інвестара на найбуйнейшы дзяржаўны піўзавод пакуль рана казаць.

«Гаворка пакуль ідзе толькі пра перадпрыватызацыйную падтрымку. Мы дапаможам кампаніі палепшыць кіраванне, ІТ, кантроль якасці і гэтак далей, калі выпрацуем сумесны план дзеянняў», — сказаў tut.by прадстаўнік ЕБРР Антон Усаў.

На гэтым тыдні на сустрэчы з журналістамі старшыня канцэрна «Белдзяржхарчпрам», куды ўваходзіць «Крыніца», Аляксандр Забела заявіў пра тое, што «ўжо ёсць дзве транснацыянальныя кампаніі (ТНК), якія досыць сур'ёзна глядзяць на «Крыніцу», вырабляюць на ёй пэўную лінейку ліцэнзійнай прадукцыі». Ён удакладніў, што гэта кампаніі з Даніі і Турцыі, але не назваў іх, адзначыўшы толькі, што «гэта не «Карлсберг». Летась турэцкая кампанія Anadolu Efes падпісала ліцэнзійнае пагадненне з «Крыніцай» на разліў «Залатой бочкі» і заявіла, што не супраць стаць акцыянерам менскага завода.

Аляксандр Забела мяркуе, што прадпрыемству за некалькі гадоў атрымалася «вярнуць сваю долю на рынку і лаяльнасць спажыўцоў». Цяпер «самая вялікая праблема — плацяжы па раней узятых крэдытах». «Кожны месяц трэба блізу 50 млрд недэнамінаваных рублёў плаціць толькі па адсотках. Але цяпер прадпрыемства працуе з чыстым прыбыткам, з рэнтабельнасцю і да яго змянілася і стаўленне ЕБРР», — сказаў старшыня канцэрна.

«Дэлегацыя на чале з віцэ-прэзідэнтам банка была на прадпрыемстве ў красавіку. Мы правялі прэзентацыю таго, што робіцца, яны паспрабавалі прадукцыю, прайшліся па вытворчасці. Сёння ў канцэрне праходзяць перамовы з іх прадстаўнікамі, яны больш дэталёва глядзяць на маркетынгавую і вытворчую палітыку і ўжо сур'ёзна падышлі да пошуку магчымых інвестараў, хоць у нас яны ўжо, магчыма, і ёсць», — заявіў Забела.

Даход «Крыніцы», у якой дзяржаве належыць 84,5% акцый, за 2016 год склаў 88,6 млн. рублёў, што на 12,2 млн рублёў больш за паказчык 2015 года. Пры гэтым чысты прыбытак павялічыўся ў 19 разоў: з 2 да 38 тысяч рублёў. На пачатак гэтага года на балансе завода значыліся крэдыты і пазыкі на 34,5 млн. рублёў. Кароткатэрміновая крэдыторская запазычанасць склала 25,1 млн. рублёў.

На беларускім рынку тры асноўных піўзаводы кантралююць міжнародныя кампаніі. Размовы аб прыходзе ТНК на «Крыніцу» вядуцца даўно. Пра свае планы паведамлялі SABMiller, Oasis, Anheuser-Busch Inbev, а «Балтыка» нават інвеставала ў завод, але потым са скандалам выходзіла з праекта.

Цяпер, са слоў удзельнікаў рынку, пры падтрымцы ЕБРР, магчыма, хтосьці зойдзе ў «Крыніцу». «Але, відавочна, прыйдзецца заплаціць высокую цану дзяржаве за набыццё пакета акцый, захаваць усе сацыяльныя абавязанні і гэтак далей. Аднак на стагнуючым піўным рынку хутка акупіць укладанні будзе няпроста. Таму складана ўявіць, якой можа быць канфігурацыя. Яна цяпер так проста не праглядаецца. Можа быць, пастанова будзе знойдзена з дапамогай крэдыту, які дасць ЕБРР», — разважаюць удзельнікі рынка. Магчыма, банк стане акцыянерам піўзавода? «Як правіла, пытанне аб нашым акцыянерным удзеле вырашаецца пасля прыходу стратэгічнага інвестара», — адказаў Усаў. Варта адзначыць, што ў перыяд з 2003-га да 2008 года дзяржаўны пакет у «Крыніцы» знаходзіўся ў даверным кіраванні Прыёрбанка.

Восенню 2016 года ўрад Беларусі прапанаваў ЕБРР узяць удзел у перадпрыватызацыйнай падрыхтоўцы некалькіх беларускіх прадпрыемстваў. Банк, мяркуючы па ўсім, прыняў пастанову пачаць гэты працэс з «Крыніцы».