У Арменіі ўспамінаюць ахвяр генацыду

У памятных мерапрыемствах у Ерэване ўдзельнічалі вышэйшае кіраўніцтва краіны, духавенства, прадстаўнікі дыпмісій.

У Ерэване ў панядзелак, 24 красавіка, адбудуцца жалобныя мерапрыемствы, прысвечаныя 102-й гадавіне генацыду, учыненага ў 1915 годзе ў дачыненні да армян у Асманскай імперыі.

Гэта быў першы генацыд ХХ стагоддзя, ягонымі ахвярамі сталі 1,5 млн чалавек, піша ТАСС.

Цэнтрам усенароднага паломніцтва стане мемарыяльны комплекс у Ерэване, які быў узведзены ў 1967 годзе. Паводле задумы стваральнікаў, архітэктараў Артура Тарханяна і Сашура Калашана, помнік сімвалізуе як смутак па загінулых, так і адраджэнне армянскага народа. Каля мемарыяла заўсёды гучыць сумная музыка, а пасярод 12 нахіленых базальтавых пілонаў, якія ўтвараюць конус, гарыць вечны агонь.

Раніцай мемарыял наведала кіраўніцтва рэспублікі на чале з прэзідэнтам Сержам Саргсянам, а таксама архірэі Армянскай апостальскай царквы пад кіраўніцтвам патрыярха Гарэгіна II. Ва ўсіх яе храмах у краіне і за мяжой пройдуць паніхіды, армянская царква прылічыла да ліку святых усіх ахвяраў генацыду.

У панядзелак у Ерэване таксама адбудзецца канцэрт Усеармянскага аркестра, які аб'яднае 90 прафесійных музыкаў армянскага паходжання з 24 краін. Ён пройдзе на сцэне Нацыянальнага акадэмічнага тэатра оперы і балета імя Спендзіярава.

«Гэтым унікальным, беспрэцэдэнтным праектам мы жадаем прадэманстраваць, што рассеяныя па ўсяму святу армяне ўсё адно адзіныя, - заявіў раней міністр культуры Арменіі Армэн Аміран. - Мы аб'ядналіся, каб не толькі ўшанаваць памяць нашых загінулых продкаў, але і прадэманстраваць адзінства і творчы патэнцыял нашага народа».