Заўтра ў Менску пройдзе «Чарнобыльскі шлях»
20- 25.04.2017, 10:29
- 20,701
Акцыя пачнецца а 18 гадзіне каля кінатэатра «Кастрычнік» на станцыі метро Акадэмія Навук.
Сталічныя ўлады дазволілі вячэрні час правядзення шэсця: на патрабаванне заяўнікаў акцыі ўлады змянілі час правядзення «Чарнобыльскага шляху» з 14.00 на 18.00. Лідары апазіцыі мяркуюць, што на фоне падзей пратэстнай вясны гэтага года, акцыя можа сабраць шмат людзей, паведамляе «Белсат».
Збор удзельнікаў «Чарнобыльскага шляху - 2017» пачнецца а 18 гадзіне каля кінатэатра «Кастрычнік». Само шэсце пачнецца а 18:30 па ходніках праспекта Незалежнасці, вуліцах Сурганава і Арлоўскай да плошчы Бангалор, дзе ў 20 гадзін запланаваны мітынг і ўскладанне кветак ля памятнага знака «Ахвярам Чарнобыля».
Заяўнікі цяперашняй акцыі маюць намер вылучыць да ўладаў два асноўныя патрабаванні: спыненне будаўніцтва атамнай электрастанцыі ў Астраўцы і тэрміновая рэалізацыя праграмы ліквідацыі наступстваў аварыі на Чарнобыльскай АЭС.
«Сённяшні Чарнобыльскі шлях адрозніваецца яшчэ і тым, што ён адбываецца на фоне сацыяльных пратэстаў, якія набіраюць сілу. Таму кожная дазволеная, выдраная ў гарвыканкаме з баямі акцыя пратэсту - гэта шанец паказаць, што нязгодных у Беларусі не сотні, а тысячы і нават дзясяткі тысяч», - заявіў сустаршыня БХД Віталь Рымашэўскі.
Заяўнікі акцыі маюць намер патрабаваць ад уладаў не толькі спынення будаўніцтва беларускай АЭС і правядзення эканамічных рэформаў, але і палітычных рэформаў, і ў першую чаргу – вызвалення ўсіх палітвязняў.