Адказнасць за тэракт у Пецярбургу ўзялі ісламісты
11- 25.04.2017, 20:10
- 22,849
Адзначаецца, што «Батальён» быў створаны пасля «расейскай інтэрвенцыі» ў Сірыі.
Адказнасць за тэракт узяла на сябе звязаная з «Аль-Каідай» групоўка.
Аб гэтым паведамляе republic.ru са спасылкай на SITE.
Праект дадае, што баевікі прыстрашылі новымі тэрактамі. РБК удакладняе назву групоўкі – «Каціба аль-Імам Шаміль» («Батальён імама Шаміля»), пра які нічога не вядома.
Як паведамляе Reuters, «Каціба аль-Імам Шаміль» сцвярджае, што дзейнічала на загад лідара «Аль-Каіды» Аймана аль-Завахіры. У заяве групоўкі тэракт у Пецярбургу названы адказам на ўмяшанне Расеі ў справы Сірыі ды Лібіі, а таксама Чачні.
Адзначаецца, што «Батальён» быў створаны пасля «расейскай інтэрвенцыі» ў Сірыі. Як гаворыцца ў заяве, групоўку назвалі ў гонар «чачэнскага камандзіра, забітага расейскімі спецслужбамі ў Інгушэціі ў 2006 годзе».
«Коммерсантъ» і «Газета.Ru» пісалі аб магчымай датычнасці да выбуху ў пецярбуржскім метро арганізацыі «Таўхід валь-Джыхад».
У пачатку 2017 года яна аб'ядналася з «Хайят Тахрыр аш-Шам», створанай на аснове «Фронту ан-Нусры», які лічыўся сірыйскім крылом «Аль-Каіды». У 2016 годзе групоўка адхрысцілася ад «Аль-Каіды» і пераназвалася.
Як пісала «Газета.Ru», меркаваным замоўцам пецярбуржскага тэракту стаў лідар «Таухід валь-Джыхад» Абу Салах аль-Узбекі (Сіражыдзін Мухтараў). З інфармацыі выдання, яго шукае Інтэрпол, баевіка абвінавачваюць у арганізацыі атакі на кітайскае пасольства ў Бішкеку.
Выбух у вагоне метро ў Санкт-Пецярбургу адбыўся 3 красавіка. Загінулі 16 чалавек, у тым ліку магчымы выканаўца тэракту. Акрамя яго і меркаванага замоўцы ў справе фігуруюць яшчэ 8 чалавек, іх арыштавалі 7 красавіка.