ЗША размяшчаюць у Паўднёвай Карэі сістэму СПА
- 26.04.2017, 16:31
- 15,998
У сераду сістэму ПРА перавезлі на поле былога гольф-клуба ў правінцыі Санджу.
На фоне ўсё большых трэнняў з нагоды ракетных і ядзерных амбіцый КНДР амерыканскія вайскоўцы прыступілі да разгортвання ў Паўднёвай Карэі сістэмы супрацьракетнай абароны THAAD, што выклікала вельмі неадназначную рэакцыю як унутры краіны, так і за мяжой, паведамляе расейская служба BBC.
У правінцыі Санджу, куды ў сераду перавезлі абсталяванне комплексу, калону амерыканскай вайсковай тэхнікі сустрэлі сотні дэманстрантаў, якія пратэстуюць супраць размяшчэння там сістэмы ПРА.
Пекін заяўляе, што разгортванне комплексу THAAD падрывае бяспеку ў рэгіёне.
Баючыся, што Пхеньян плануе новыя ракетныя і ядзерныя выпрабаванні, ЗША ўжо адправілі да ўзбярэжжа Карэйскага паўвострава авіяносную групу.
На сераду прызначаны і сакрэтны брыфінг ў Белым доме, на які запрошаны адразу ўсе 100 чальцоў амерыканскага сената. Акрамя таго, Вашынгтон звярнуўся ў Раду Бяспекі ААН з заклікам неадкладна заняцца развязаннем паўночнакарэйскай праблемы і паралельна паспрабаваў заручыцца падтрымкай Пекіна.
Сістэма THAAD (Terminal High Altitude Area Defense) - мабільны комплекс наземнага базавання, прызначаны для перахопу балістычных ракет малой і сярэдняй далёкасці і закліканы абараніць Паўднёвую Карэю ад ракетнай пагрозы з боку паўночнага суседа.
Як удакладнілі ў паўднёвакарэйскім міністэрстве абароны, размяшчэнне сістэмы ПРА было ўзгодненае яшчэ ў летась, аднак у эксплуатацыю яно будзе ўведзенае толькі да канца 2018 года.
Разгортванне супрацьракетнага комплексу THAAD супала ў часе са спускам на ваду новага кітайскага авіяносца - другога авіяносца ў арсенале Пекіна, але першага, створанага ў самім Кітаі.