На колькі патаннелі кватэры ў буйных гарадах Беларусі

З пачатку года прадаўжаецца падзенне коштаў жылля ва ўсіх абласных цэнтрах.

З пачатку года ва ўсіх абласных цэнтрах, а таксама ў Мазыры, Полацку і Лідзе, кошты кватэр прадоўжылі падаць, паведамляе realt.by. У Гародні і Гомелі за студзень-сакавік кошты апусціліся больш чым на 5%.

Іншая група, якая складаецца выключна з буйных гарадоў без статусу абласнога цэнтра, адзначылася станоўчай дынамікай. Прычым у некаторых з іх тэмпы росту коштаў былі досыць высокімі, напрыклад +3 ... 4% у Салігорску, Пінску і Оршы.

А Менск з паказчыкам -0,4% за першы квартал 2017 году знаходзіўся роўна ў сярэдзіне спісу.

Не сакрэт, што звычайна новыя трэнды зараджаюцца ў сталіцы, затым падзеі паўтараюцца ў абласных цэнтрах і толькі потым у астатніх буйных гарадах краіны. Сітуацыя, калі ва ўсіх абласных цэнтрах кватэры таннеюць, а ў большасці астатніх буйных гарадоў растуць у кошце, стала даволі нечаканай.

Паводле вынікаў за апошнія 12 месяцаў Менск пакуль адзіны горад, дзе сярэдні кошт прададзеных кватэр не знізіўся (+1%). Сярод абласных гарадоў самае нязначнае зніжэнне было зафіксавана ў Віцебску (-6%), а ў Гомелі кошты апусціліся нават на 15%. Сярод астатніх буйных гарадоў менш за ўсё кошты знізіліся ў прысталічных Барысаве і Маладзечне (-7%), а больш за ўсё - у Бабруйску (-14%) і Лідзе (-18%).