СМІ: 15 чалавек прапалі без вестак падчас катастрофы разведвальнага карабля РФ

45 сябраў экіпажа расейскага карабля, паводле папярэдніх звестак, былі выратаваны Берагавой аховай Турцыі.

15 чалавек, якія знаходзіліся на борце карабля Чарнаморскага флоту «Ліман», што сутыкнуўся з грузавым суднам каля праліва Басфор, уважаюцца прапаўшымі без вестак. Пра гэта паведамляе «Медуза» са спасылкай на Hurriyet і SkyNews.

45 сябраў экіпажа расейскага карабля, паводле папярэдніх звестак, былі выратаваны Берагавой аховай Турцыі. У той жа час Reuters, на якое таксама спасылаецца SkyNews, паведамляе, што з расейскага карабля былі выратаваны 78 чалавек.

У сваю чаргу РІА «Новости» цытуе заяву Берагавой аховы Турцыі, згодна з якой усе сябры экіпажа расейскага карабля выратаваныя.

Мінабароны РФ раней паведаміла, што ў выніку сутыкнення «Ліма» з іншым суднам «пацярпелых сярод экіпажа няма».

Разведвальны карабель Чарнаморскага флоту «Ліман» 27 красавіка ў Чорным моры за 40 кіламетраў ад праліва Басфор сутыкнуўся з суднам «Ашот-7». «Ліман», як паведаміла Мінабароны, атрымаў прабоіну ніжэй за ватэрлінію. Паводле звестак Hurriyet, у раёне сутыкнення быў моцны туман. Судна, якое сутыкнулася з «Ліманам», паводле звестак CNN Turk, ходзіць пад сцягам Таго.