У Брусэлі стартаваў спецсаміт Эўразвяза, прысвечаны Brexit
- 29.04.2017, 11:45
- 13,675
На саміце павінны зацвердзіць дырэктывы для перамоваў у Brexit.
У Брусэлі сёння адбудзецца саміт лідараў 27 краінаў Эўрапейскага Звяза, прысвечаны пытанню выхаду Вялікай Брытаніі з ЭЗ, паведамляе сайт Эўрапейскай рады.
На саміце павінны зацвердзіць дырэктывы для перамоваў у Brexit. Кіроўныя прынцыпы вызначаць аснову для перамоваў і агульныя пазіцыі ЭЗ падчас перамоваў.
Праект кіроўных прынцыпаў быў прапанаваны прэзідэнтам Эўрапейскай рады Дональдам Тускам і прэзентаваны дзяржавам-сябрам 31 сакавіка.
Туск таксама запрасіў на саміт галоўнага перамоўніка Эўрапейскага Звяза адносна Brexit Мішэля Барнье, каб пераканацца, што ён "знаёмы з поглядамі кіраўнікоў дзяржаваў і ўрадаў".
Нагадаем, 29 сакавіка афіцыйная працэдура выхаду Брытаніі са складу ЭЗ пачалася.
Эўразвяз планаваў пачаць прадметныя перамовы пра выхад Вялікай Брытаніі з ЭЗ з 22 траўня, але цяпер гэты тэрмін перанесены праз аб'яву датэрміновых выбараў у Брытаніі.