Канадскі канкурэнт «Беларуськалію» падвоіў чысты прыбытак

Асноўнай крыніцай росту прыбытку стала павелічэнне продажаў калійных угнаенняў.

Potash Corp дала справаздачу аб скарачэнні прыбытку ў першым квартале 2017 года на 8,1% да 1,112 млрд даляраў. Аперацыйны прыбытак кампаніі пры гэтым вырас на 38,9% да 221 млн даляраў, а чысты прыбытак павялічыўся на 98,7% да 149 млн даляраў.

Асноўнай крыніцай росту прыбытку стала павелічэнне продажаў калійных угнаенняў, якое ў спалучэнні са зніжэннем сабекошту здабычы забяспечыла рост прыбытку гэтага кірунку, піша belmarket.by.

Кампанія змагла прадаць на 400 тысяч т угнаенняў больш, чым за аналагічны перыяд мінулага года, або 2,2 млн т. Пры гэтым кошт рэалізацыі калію выявіўся на 12 даляраў за тону ніжэйшым, чым год таму, і склаў 166 даляраў за т, нягледзячы на тое, што кампанія адзначае агулам умацаванне коштаў на сусветным рынку.

Сярэдні сабекошт тоны пры гэтым знізіўся з 128 даляраў да 90 праз павелічэнне здабычы на «танным» радовішчы ў Раканвілі.

Валавы прыбытак ад азотных угнаенняў скараціўся са 107 млн да 97 млн у першым квартале гэтага года. Продажы таксама зменшыліся на 6% да 1,6 млн т. Сярэдні кошт рэалізацыі скараціўся на 15 даляраў за т да 229 даляраў.

Валавы прыбытак ад фасфатаў за год зменшыўся больш чым утрая да 11 млн даляраў.

Нагадваючы пра перспектывы 2017 года, кампанія пацвердзіла свой прагноз аб'ёмаў сусветнага рынку калійных угнаенняў на 61-64 млн т, што вышэй за 60 млн т, адгружаных прадаўцамі ў 2016-м. Кампанія разлічвае прадаць 8,9-9,4 млн т калійных угнаенняў.

«Беларуськалій» летась скараціў чысты прыбытак у пяць разоў. Айчыннаму вытворцу ўгнаенняў удалося прадаць блізу 10 млн т калію. Сёлета кампанія разлічвае збыць не меншыя аб'ёмы ўгнаенняў.