У шматпавярховіках Горадні завараць смеццеправоды

Заварыць смеццеправоды ў шматпавярховіках плануюць да 1 ліпеня.

Скончыць працу па ўладкаванні кантэйнерных пляцовак для паасобнага збору смецця і заварыць смеццеправоды ў шматпавярховіках Горадні плануюць да 1 ліпеня. Пра гэта сёння ў час жывой тэлефоннай лініі паведаміў журналістам старшыня Гарадзенскага аблвыканкама Уладзімір Краўцоў, паведамляе БелТА.

Пытанне стварэння пляцовак для паасобнага збору смецця і заварвання смеццеправодаў для гарадзенцаў сярод актуальных. Яно выклікала жывы водгук людзей, зварот паступіў і на наўпроставую лінію. Праца для змянення сістэмы абыходжання з адкідамі ў Горадні вядзецца паводле праекту Сусветнага банка. Пабудаваны смеццесартавальны завод, набытая новая тэхніка, смеццявозы, кантэйнеры. Паўсюдна ўладкоўваюцца пляцоўкі пад кантэйнеры для паасобнага збору смецця па месцы жыхарства людзей і ліквідацыя смеццеправодаў. «Гэтую працу мы павінны скончыць да ліпеня. Праблема ў тым, што далёка не заўсёды ўдаецца задаволіць пажаданні людзей аб размяшчэнні пляцоўкі - хтосьці незадаволены яе блізкасцю да дома, нехта расказвае пра тое, што пляцоўка будуецца замест дарожкі ў парк. Гэтыя пытанні можна развязаць, выканаўчай улады горада, камунальным службам проста трэба аператыўна на іх рэагаваць, прымаць пастановы, імкнучыся выканаць баланс інтарэсаў. Зрабіць гэта часам няпроста, асабліва ў старой частцы горада, дзе двары невялікія, а доступ транспарту для вывазу смецця трэба забяспечыць. Аднак трэба старацца шукаць узгодненыя развязанні, размаўляць з людзьмі і тлумачыць ім, чаму гэты спосаб абыходжання з адкідамі найбольш прымальны. Такі шлях збору і перапрацоўкі смецця - нармальны, цывілізаваны, выкарыстоўваецца ва ўсім свеце. Грамадзянам трэба гэта больш актыўна і больш даступна тлумачыць, пераконваць іх», - мяркуе губернатар.

Усяго ў Горадні будуць уладкаваны 823 кантэйнерныя пляцоўкі, на якіх усталююць ацынкаваныя кантэйнеры для паасобнага збору смецця (шкла, паперы, пластыка), а таксама змешаных адкідаў. Заварыць плануецца больш за 2 тысячы смеццеправодаў. Пры гэтым смеццеправоды ў дамах ліквідуюцца толькі тады, калі пляцоўка прынятая ў эксплуатацыю, на яе вывезеныя кантэйнеры для збору цвёрдых камунальных адкідаў.