Прэм'ер-міністр Эстоніі: Найлепшым адказам на агрэсію РФ будзе паспяховая і аб'яднаная Украіна
1- 6.04.2017, 16:17
- 23,847
Эстонія будзе прадаўжаць падтрымліваць суверэнітэт і тэрытарыяльную цэласнасць Украіны.
Суверэнітэт і тэрытарыяльная цэласнасць Украіны павінны быць цалкам адноўленыя, заявіў прэм'ер-міністр Эстоніі Юры Ратас падчас Кіеўскага форуму ў бяспецы, паведамляе «Гордан».
«Найлепшым адказам на агрэсію Расеі будзе паспяховая, палітычна і эмацыйна моцная і аб'яднаная Украіна», - адзначыў ён.
Ратас заявіў, што двухбаковыя сувязі паміж Эстоніяй і Украінай з'яўляюцца «цеснымі, моцнымі і станоўчымі».
«Мы будзем прадаўжаць падтрымліваць суверэнітэт і тэрытарыяльную цэласнасць Украіны, бо самі перажылі акупацыю; эстонцы ведаюць, што гэта такое», - дадаў прэм'ер.
Ён падкрэсліў, што «мы жывем у нявызначаныя часы».
«Мы бачым сталыя спробы падарваць мір, заснаваны на правілах міжнароднага парадку, каштоўнасці дэмакратыі і свабоды. Будучыня Украіны будзе вызначаць архітэктуру еўрапейскай бяспекі цягам наступных дзесяцігоддзяў», - заявіў Ратас.
Прэм'ер падкрэсліў важнасць супольнай працы для забеспячэння міру, бяспекі і стабільнасці ў Еўропе.
«Пазіцыя Эстоніі зразумелая: санкцыі павінны заставацца ў дзеянні да таго моманту, пакуль Расея не вернецца да поўнай павагі прынцыпаў міжнароднага права, пакуль цалкам не выканае ўсе патрабаванні Менскіх пагадненняў, каб суверэнітэт і тэрытарыяльная цэласнасць Украіны былі цалкам адноўленыя», - падкрэсліў ён.
Ратас дадаў, што выбар украінцаў - «стаць бліжэй да Еўропы». Ён адзначыў, што Эстонія будзе «рашуча падтрымліваць іх выбар».
Узброены канфлікт на ўсходзе Украіны пачаўся ў красавіку 2014 года. Баявыя дзеянні вядуцца паміж Узброенымі сіламі Украіны і прарасейскімі баевікамі, якія кантралююць частку Данецкай і Луганскай абласцей.