Экспэрты назвалі пяць найлепшых прадуктаў для добрага зроку
- 1.05.2017, 14:04
- 10,879
Прадукты, якія неабходна абавязкова ўключыць у свой рацыён, каб пазбегнуць праблем са зрокам.
У наш час бясконцага сядзення перад экранамі манітораў і тэлевізараў многія шукаюць прадукты, якія неабходна абавязкова ўключыць у свой рацыён, каб пазбегнуць праблем са зрокам, піша healthyliving.com.ua.
Як раяць экспэрты, для добрага зроку неабходныя прадукты, багатыя на вітаміны А і С.
Вітамін А з'яўляецца складовай часткай пігменту сятчаткі вочы. Ён патрэбны пры ўсякіх парушэннях гледжання. Яго недахоп выклікае курыную слепату (калі зрок становіцца слабым у прыцемках).
Вітамін С абараняе судзіны, якія забяспечваюць кровазварот сятчаткі вочы.
1. Морква
Гэтая гародніна многім знаёмая з дзяцінства: мабыць, кожнага з нас бацькі прымушалі грызці моркву, аргументуючы тым, што яна добрая для зроку. Дарослыя не хлусілі: заячая радасць, і праўда, багатая бэта-карацінам, які ў арганізме ператвараецца ў вітамін А. Ён удзельнічае ў працэсах аднаўлення функцыі вачэй і прадухіляе развіццё курынай слепаты. Але зрок морква, як прынята думаць, на жаль, не паляпшае.
2. Чарніцы
Гэтая чорная ягада ў важнасці для зроку знаходзіцца на адной прыступцы з морквай. Яна багатая вітамінам С, дапамагае захаваць вастрыню зроку, здымае стомленасць вачэй пасля прагляду тэлевізара і працы з кампутарам. Таму чарніцы асабліва добрыя для офісных работнікаў. У чарнічны сезон лекары рэкамендуюць з'ядаць не менш за 10 шклянак свежых ягад. Зімой жа іх можна есці, перацёршы з цукрам.
3. Шпінат
Багаты вітамінам С. Ужыванне гэтай культуры 2-4 разы на тыдзень зніжае рызыку ўзроставай слепаты і развіцця катаракты. Амерыканскія навукоўцы наогул мяркуюць, што шпінат зможа лячыць некаторыя формы слепаты і цяпер працуюць над распрацоўкай такой гаючай методыкі.
4. Яйкі
Багатыя вітамінам А. І нават нягледзячы на тое, што ў іх яго не так шмат, як у моркве, дастаткова ўсяго двух яек (жаўткоў), каб задаволіць сутачную патрэбнасць арганізма ў гэтым вітаміне.
5. Апельсіны
У адным апельсіне змяшчаецца сутачная доза вітаміну С. Але гэты цытрус яшчэ багаты і вітамінам А. Вядома і тое, што эфірны алей апельсіна павышае вастрыню зроку.