Машына без кіроўцы збіла 70-гадовую пенсіянерку ў Віцебску

Выратаваць жанчыну медыкі не змаглі.

Машына без кіроўцы на смерць збіла пенсіянерку ў Віцебску, паведаміў БелТА кіраўнік аддзялення агітацыі і прапаганды ДАІ УУС Віцебскага аблвыканкама Аляксандр Казючыц.

Аварыя адбылася 13 траўня блізу 14.30. «Жыхарка Віцебска 1980 года нараджэння за рулём Toyota прыехала на працу па знаёмым маршруце і прыпаркавала машыну на схіле. Праз некаторы час яна пачула крыкі мінакоў пра тое, што яе машына коціцца назад. Падбегшы, убачыла, што аўтамабіль ужо паспеў заднімі коламі пераехаць пажылую жанчыну. Мабыць, яна ішла ўздоўж збочыны, калі аўто нечакана пакацілася і збіла яе», – растлумачыў Аляксандр Казючыц.

Ратавальнікі дапамаглі дастаць 70-гадовую жанчыну з-пад машыны, аднак медыкі канстатавалі смерць пенсіянеркі. Паводле гэтага факта праводзіцца праверка, іншамарка дастаўленая на штрафстаянку. Будуць прызначаныя экспертызы, якія дапамогуць вызначыць, чаму аўтамабіль пакаціўся назад.