Змяншэнне запасаў нафты названае пагрозай для Расеі

РФ не змагла пазбавіцца ад статусу краіны-бензакалонкі.

Вычэрпванне экспартна-сыравіннай мадэлі развіцця і змяншэнне запасаў нафты і газу названыя ў ліку асноўных фактараў рызыкі для Расеі. Пра гэта гаворыцца ў стратэгіі эканамічнай бяспекі краіны да 2030 года, якую зацвердзіў Уладзімір Пуцін. Дакумент апублікаваны на афіцыйным партале прававой інфармацыі, піша grani-ru-org.

У ліку галоўных пагроз эканамічнай бяспекі ў дакуменце пералічаныя «вычэрпванне экспартна-сыравіннай мадэлі эканамічнага развіцця, значнае зніжэнне ролі традыцыйных фактараў забеспячэння эканамічнага росту», а таксама «адсутнасць расейскіх несыравінных кампаній сярод глабальных лідараў сусветнай эканомікі».

Таксама ў дакуменце гаворыцца аб змяншэнні запасаў гаручых карысных выкапняў у сувязі з паступовым вычэрпваннем дзейных радовішчаў, і ваганні кан'юнктуры сусветных таварных і фінансавых рынкаў.

Сярод асноўных пагроз эканамічнай бяспекі аўтары дакумента таксама называюць недахоп працоўнай сілы, рост разрыву паміж даходамі багатых і бедных і ўведзеныя ў дачыненні да краіны эканамічныя санкцыі, якія аўтары дакумента характарызуюць як «дыскрымінацыйныя захады».

Акрамя таго, у стратэгіі адзначаецца, што Расеі трэба ўдасканальваць механізм увядзення захадаў у адказ у выпадку, калі яна сама трапляе пад санкцыі з боку іншых дзяржаў, а таксама аптымізаваць плыні працоўных мігрантаў.

У студзені на гайдараўскіх форуме кіраўнік савета Цэнтра стратэгічных распрацовак Аляксей Кудрын заявіў, што Расея ў тэмпах эканамічнага росту саступае нават СССР часоў застою. «Мы цяпер знаходзімся на досыць гістарычна нізкіх тэмпах эканамічнага росту, якія нават ніжэйшыя, чым у перыяд застою ў Савецкім Саюзе», - сказаў Кудрын. - Мы трапілі ў працяглую паласу нізкіх тэмпаў, якія не звязаныя толькі са зніжэннем коштаў нафты або санкцыямі. Мы павінны сказаць, што асноўныя праблемы ляжаць унутры нашай Расеі, і асноўныя - гэта інстытуцыйныя і структурныя».

На думку Кудрына, Расея позніцца з рэформамі. «Не ўжываюцца рашучыя захады, якія б дазволілі стварыць і запусціць новую мадэль эканомікі. Перад намі стаяць вельмі сур'ёзныя выклікі, якія аб'ектыўна стрымліваюць наш эканамічны рост, - сказаў Кудрын. - І тыя крокі, якія павінна рабіць наша краіна, урад, прэзідэнт, яны неардынарныя. Яны досыць сур'ёзныя».

За галоўныя выклікі Кудрын уважае, перш за ўсё, дэмаграфічныя праблемы, недахоп інвестыцый, уключаючы праблемы санкцый і дыстанцыявання ад сусветных фінансавых рынкаў, нізкая прадукцыйнасць і якасць дзяржаўнага кіравання. Аднак асноўная праблема - тэхналагічнае адставанне Расеі. Яна, на думку кіраўніка ЦСР, нясе пагрозу самому суверэнітэту краіны.

« Гэта азначае сціск нашага эканамічнага патэнцыялу і зніжэнне ўзроўню жыцця грамадзян, бо мы будзем губляць рынкі, не будзем удзельнічаць у гэтых новых рынках».