«Беларуськалій» знізіць вытворчасць і экспарт
7- 17.05.2017, 12:42
- 21,252
У другім паўгоддзі 2017 года будуць праводзіцца прыпыначныя рамонтныя працы на руднях «Беларуськалія».
Пра гэта гаворыцца ў паведамленні Беларускай калійнай кампаніі, якая з'яўляецца трэйдарам салігорскага камбіната.
З прычыны гэтага «адбудзецца зніжэнне аб'ёмаў выпускаемай прадукцыі і адпаведнае скарачэнне аб'ёмаў экспарту беларускіх калійных угнаенняў», піша tut.by.
Прыпыначныя рамонты будуць праходзіць паслядоўна. Між іншым, у ліпені запланавана правядзенне капітальнага рамонту на першым рудаўпраўленні «Беларуськалія». Яго магутнасць складае блізу 265 тыс. тон угнаенняў у месяц. На 1РУ вырабляюцца як грануляваны, так і дробны ружовы прадукт.
«Беларуськалій» кантралюе блізу 19% сусветнага рынку ўгнаенняў і пастаўляе іх у асноўным на рынкі Кітая, Індыі, Бразіліі і Паўднёва-Усходняй Азіі.
Агульны аб'ём экспартаваных беларускіх калійных угнаенняў у 2016 годзе дасягнуў 9,5 млн тон супраць 9,2 млн у 2015 годзе. Аднак у грашовым выражэнні краіна недалічыла 651 млн даляраў.
Улады Беларусі спадзяваліся на рост экспарту калійных угнаенняў да 10 млн. тон паводле вынікаў 2017 года. У Беларускай калійнай кампаніі ў лютым лічылі, што 10 млн. тон можа быць вельмі добрым з пункту гледжання аб'ёмаў арыенцірам. «Але БКК у сваёй працы зыходзіць з рэальнай патрэбнасці рынку і даходнасці продажаў. Калі рынку патрабуецца пэўнае зніжэнне прапановы, мы дзейнічаем адэкватна», — падкрэсліў прадстаўнік кампаніі.
За апошні год перыядычна паступалі паведамленні аб гібелі і траўмах людзей на тэрыторыі «Беларуськалія».