Агучаныя версіі пажару на піўзаводзе ў Гародні

З размешчаных у непасрэднай блізкасці ад месца пажару будынкаў канфіскаваныя запісы камер вонкавага відэаназірання.

Следчы камітэт праводзіць праверку паводле факту пажару ў будынку былога піўзавода ў Гародні, паведаміў БелТА афіцыйны прадстаўнік УСК Гарадзенскай вобласці Сяргей Шаршаневіч.

«Праведзены пільны агляд месца здарэння. Канфіскаваныя сляды і аб'екты, якія могуць спрыяць высвятленню прычыны пажару. Прызначанае правядзенне пажарна-тэхнічнай, судова-хімічнай і шэрагу іншых крыміналістычных экспэртыз. На сёння ў якасці асноўных версій узгарання разглядаюцца неасцярожнае абыходжанне з агнём і падпал», - адзначыў Сяргей Шаршаневіч.

Следчыя і супрацоўнікі органаў унутраных спраў высвятляюць і апытваюць відавочцаў здарэння. З размешчаных у непасрэднай блізкасці ад месца пажару будынкаў канфіскаваныя запісы камер вонкавага відэаназірання. «Запытана службовая, тэхнічная і іншая дакументацыя на неэксплутаваныя аб'екты. З улікам адсутнасці вартавой аховы і неабмежаванага доступу на тэрыторыю аб'екта вывучаецца пытанне прававой рэгламентацыі забеспячэння яго захаванасці. Вылічваецца сума прычыненай матэрыяльнай шкоды. Праводзяцца іншыя працэсуальныя дзеянні», - дадаў ён.

Пасля праверкі будзе дадзеная прававая ацэнка таму, што адбылося. Акрамя таго, следчыя прымуць захады для ліквідацыі прычын і ўмоў, якія спрыялі ўзнікненню пажару ў будынку, які мае гістарычна-культурную каштоўнасць.

Паведамленне пра ўзгаранне 21 траўня неэксплутаванага будынка піўзавода паступіла ў Гародзенскую абласную ўправу МНС пад 16 гадзін. У выніку пажару агнём знішчаны дах на ўсёй плошчы будынка (600 кв.м), выгаралі памяшканні трэцяга паверха. Ніхто не пацярпеў. Да 18.00 пажарныя брыгады патушылі агонь.