28 сакавiка 2024, Чацвер, 23:25
Падтрымайце
сайт
Сім сім,
Хартыя 97!
Рубрыкі

Данкверт пачаў новую прадуктовую вайну супраць Беларусі

12
Данкверт пачаў новую прадуктовую вайну супраць Беларусі

Пад санкцыі «Рассельгаснагляду» патрапілі амаль 100 беларускіх прадпрыемстваў.

«Рассельгаснагляд» апублікаваў «чорны спіс» з амаль ста беларускіх прадпрыемстваў, 34 з якіх маюць ветэрынарна-санітарны статус з «узмоцненым лабараторным кантролем», 26 - папярэджанне - і яшчэ 36, да якіх у кантрольнага ведамства асаблівыя патрабаванні.

Спіс не канчатковы

«Пуцін хоча, каб Лукашэнка перакрыў гэтыя каналы, а беларускі бок не прызнае наяўнасць гэтых каналаў рээкспарту, таму Расея вымушана ціснуць на Беларусь вось такім чынам», - распавяла «Белсату» Іна Гармель, журналістка «Agrolive.by».

Як раз з сённяшняга дня «Рассельгаснагляд» увёў часовыя абмежаванні на пастаўку ў Расею прадукцыі з яшчэ трох беларускіх прадпрыемстваў - «Мясапрадукт», «Ружовы кіт» і Мясны двор «Тарасава». А 22-га траўня быў зацверджаны ўзмоцнены лабараторны кантроль, які тычыцца прадукцыі дзевяці айчынных мяса-малочных прадпрыемстваў. З такімі мерамі расейскага боку не згодны былы прэм'ер, сябра калегіі Еўразійскай эканамічнай камісіі Сяргей Сідорскі, які ў інтэрв'ю нашаму тэлеканалу заявіў наступнае.

«Галоўнае - прадукцыя прадаецца і шануецца пакупнікамі. І гэта відаць, бо беларуская прадукцыя на працягу дня, двух, трох дзён фактычна не мяняецца ў складзе кансістэнцыі. Адчыняеш іншы прадукт, імпартны - там ужо сыроватка і палова банкі адслаілася. Вось дзе праблему трэба ўбачыць, а не лавіць блох там, дзе іх няма», - упэўнены былы прэм'ер-міністр.

Паездка Лукашэнкі ў Кітай раздражняе Маскву?

Асабліва прыкметныя, кажучы словамі былога прэм'ера, «блохі», сталі пасля візіту прэзідэнта Беларусі ў Кітай. Хоць яшчэ два дні таму міністр сельскай гаспадаркі Расеі Аляксандр Ткачоў паводле вынікаў перамоў з беларускім бокам паведаміў, што Масква зняла забарону на пастаўкі з двух мясных і сямі малочных беларускіх прадпрыемстваў, і на працягу тыдня-дзесяці дзён павінен адбыцца наступны этап перамоваў, каб зняць і іншыя забароны. Паводле ацэнак экспэртаў, такая гульня Лукашэнкі з кітайскімі рынкамі - празрысты пасыл Крамля кіраўніку Беларусі.

«Калі ўлічваць, што падчас візіту Лукашэнкі ў Кітай разглядаліся два пытанні - гэта інвеставанне адной з буйных кітайскіх карпарацый у тую ж малочную прадукцыю, і другое - пра допуск беларускай ялавічыны на беларускі рынак, гэта лёгка звязаць з тымі мерамі, якія прымае Расея», - кажа Гармель.

Яшчэ ў лютым Аляксандр Лукашэнка абвінаваціў ва ўсіх харчовых бедах кіраўніка «Рассельгаснадзора» Сяргея Данкверта і загадаў айчынным праваахоўнікам надзець на яго кайданкі за ўчыненне шкоды Беларусі. Праўда, Крэмль на гэта таксама мае сваё меркаванне: на днях Генпракуратура Расеі апублікавала адказ на запыт цэнтра «Транспэрэнсі Інтэрнэшнл - Расея», не знайшоўшы ніякіх камерцыйных інтарэсаў расейскага чыноўніка ў абмежаванні паставак беларускай прадукцыі.

Напісаць каментар 12

Таксама сачыце за акаўнтамі Charter97.org у сацыяльных сетках