«Абвяшчэнне патрыётаў палітвязнямі - непрыемная рэч для ўлад»

Дапамагчы затрыманым у «справе патрыётаў» можа толькі салідарнасць грамадства, праваабаронцаў і міжнародных структур.

Пра гэта ў інтэрв'ю «Заўтра тваёй краіны» заявіў палітолаг Валер Карбалевіч.

- Праваахоўныя органы дзейнічаюць інэрцыйна, ім дадзенае заданне, і яны яго выконваюць, справядліва і несправядліва, спрабуючы што-небудзь з гэтага скласці, - адзначае палітолаг Валер Карбалевіч. - А вось на ўзроўні палітычнага кіраўніцтва - у мяне складваецца ўражанне, што ўлады ў роздуме, што яны да канца не разумеюць, што з гэтым рабіць.

З аднаго боку пагроза вулічных пратэстаў нікуды не знікла, бо не зніклі прычыны, што іх спарадзілі.

- Зноў жа ў гэтую прапагандысцкую кампанію быў укладзены вялікі капітал: вялікі артыкул на дзвюх з паловай палосах у «СБ», два выкрывальныя фільмы на цэнтральнай беларускай тэлевізіі. І што, цяпер усіх адпусціць? - кажа палітолаг. - З іншага боку, і працягваць няма на чым, бо гэта абсалютна пустая справа на пустым месцы.

А тут плануецца сэсія ПА АБСЕ, працэс «нармалізацыі» стасункаў з Захадам, хоць і прысуняўся, але не спыніўся.

- У мяне такое ўражанне, што пакуль пастанова не прынятая, - кажа Валерый Карбалевіч. - Усё-ткі кагосьці адпускаюць пад падпіску аб нявыездзе. Магчыма, улады спрабуюць гэтую справу замарудзіць, але чакаюць пакуль.

Валерый Карбалевіч мяркуе, што падследным у ізалятарах застаецца разлічваць на падтрымку грамадскасці, праваабаронцаў, на ціск з боку заходніх структур.

- Вось і Андрэа Віктарын, амбасадарка Еўразвязу ў Беларусі, надоечы адзначыла, што за гэтай справай сочаць. І абвяшчэнне затрыманых палітычнымі вязнямі - непрыемная рэч для беларускіх улад, - падрахоўвае палітолаг.

Праваабарончаму цэнтру «Вясна» стала вядома пра працяг абранай меры стрымання ў дачыненні да двух фігурантаў справы «аб падрыхтоўцы масавых непарадкаў» - <>bАндрэя Дундукова і Уладзіміра Фёдарава.

Андрэй Дундукоў, які затрыманы 21 сакавіка і знаходзіцца ў следчым ізалятары №1, застанецца пад вартай яшчэ на чатыры месяцы. Уладзімір Фёдараў, які затрыманы 29 сакавіка і знаходзіцца ў ізалятары КДБ, - на два месяцы.

На працягу дня з'явілася аналагічная інфармацыя наконт Сяргея Стрыбульскага, які быў затрыманы 21 сакавіка і цяпер знаходзіцца ў следчым ізалятары №1. Яму тэрмін утрымання пад вартай падоўжаны на два месяцы.