Беларусь стала галоўным пакупніком турэцкіх памідораў
11- 28.05.2017, 14:19
- 16,978
На нашу краіну прыпала блізу траціны ўсяго турэцкага экспарту таматаў з пачатку года.
Беларусь стала асноўным пакупніком турэцкіх памідораў. За першы квартал наша краіна набыла таматаў на 32,4 мільёна даляраў. Такія звесткі Інстытута статыстыкі Турцыі апублікавала агенцтва «Анадолу» (пераклад – tut.by).
На Беларусь прыпала блізу траціны ўсяго турэцкага экспарту таматаў на 123 мільёны даляраў. Акрамя нас, у тройцы апынуліся Румынія (18 мільёнаў даляраў) і Польшча (11,8 мільёна даляраў).
Пасля скандалу са збітым туркамі расейскім ваенным самалётам, РФ увяла забарону на ўвоз прадуктаў харчавання з Турцыі. У канцы траўня бакі дамовіліся пра зняцце некаторых абмежаванняў, але імпарт таматаў у Расею ўсё яшчэ знаходзяцца ў «чорным спісе».
Больш за палову ўраджаю таматаў вырабляецца ў пяці правінцыях Турцыі. Лідарам у аб'ёмах вытворчасці таматаў з'яўляецца правінцыя Анталья.