Купляць валюту ў Беларусі можна будзе без пашпарта

У Беларусі касуецца патрабаванне рэгістрацыі банкамі пашпартных звестак фізічных асоб, якія набываюць замежную валюту.

Адпаведны ўказ Аляксандр Лукашэнка падпісаў 29 траўня, паведамляе прэс-служба правадыра.

Нацыянальнаму банку даручана за трохмесячны тэрмін забяспечыць прывядзенне актаў заканадаўства ў адпаведнасць з гэтым дакументам і прыняць іншыя захады для яго рэалізацыі.

Указ распрацаваны ў мэтах лібералізацыі валютнага рэжыму і спрашчэння парадку правядзення валютна-абменных аперацый. Ён уваходзіць у дзеянне пасля афіцыйнага апублікавання.