Сяргей Гурэнка: Цяпер важна, каб «Дынама» акрыяла і зайграла

В.а. галоўнага трэнера сталічнага футбольнага клуба распавёў аб прызначэнні ў каманду.

- Яшчэ ў суботу вы кіравалі дублюючым складам у матчы супраць «Гарадзеі», а ўчора вас прызначылі ў асноўны склад. Што скажаце пра такую ракіроўку?

- Для мяне гэта стала нечаканасцю. Так, гульні ў каманды не было, але вынік жа не самы сумны - усяго два балы ад першага месца. Думаю, што вылет з кубка плюс не самая яркая гульня і адбіліся на такой пастанове кіраўніцтва клуба, - распавёў выконваючы абавязкі галоўнага трэнера менскага «Дынама» Сяргей Гурэнка dinamo-minsk.by.

- Разам з тым, вы застаяцеся памочнікам галоўнага трэнера нацыянальнай каманды Сербіі. Гэта не стала перашкодай?

- Так, я захоўваю свае абавязанні перад сербамі. Да канца года ёсць тры выклікі ў нацыянальную каманду, на непрацяглы час. Падчас маёй адсутнасці ў клубе мяне будуць замяняць мае памочнікі.

- Над пастановай узначаліць асноўны склад доўга не думалі?

- Калі б не ўзначаліў я, то прыйшоў бы хтосьці іншы, хто яшчэ не знаёмы са структурай клуба і яго гульцамі. Для знаёмства трэба час, якога цяпер проста няма. Таму я наважыўся прыняць прапанову кіраўніцтва.

- Першачарговая задача для вас?

- Цяпер важна каб «Дынама» акрыяла і зайграла. Каманда выдатна і плённа папрацавала на зборах. Хлопцы падрыхтаваныя функцыянальна, але ў каманды ёсць праблема псіхалагічнага плану - будзем развязваць яе.

- У дублі вы аддалі прыярытэт схеме з трыма цэнтральнымі абаронцамі і выкарыстоўвалі выключна яе. Разам з асновай плануеце не здраджваць сабе?

- Пастанову будзем прымаць, зыходзячы з магчымасцяў нашага складу. Практычна гэтую ж схему практыкуем мы і ў нацыянальнай камандзе Сербіі, ды і многія клубы ў Еўропе гуляюць так. Больш за год мы выкарыстоўваем гэты варыянт у дублі. Сяргей Уладзіміравіч Бароўскі таксама прапагандаваў гэтую схему ў асноўным складзе, так што веру, што ў хлопцаў не будзе праблем. Для нас прыярытэт – гульня ў атацы.

- Вы, як ніхто іншы, знаёмыя з моладдзю. Ці варта чакаць, што той жа Чыж або Кійко, напрыклад, нарэшце, атрымаюць свой шанец і ў асноўным складзе?

- Я магу сказаць, што шанцы будуць ва ўсіх. Да трэніравальнага працэсу будзем прыцягваць больш маладых хлопцаў, таму цяпер усё залежыць ад іх - хай даводзяць і пераканаюць мяне, нашых заўзятараў, кіраўніцтва, што яны годныя месца ў аснове. А мы толькі можам дапамагчы хлопцам, накіраваць іх.

- Дублюючы склад вы пакідаеце свайму памочніку - Міхаілу Міхайлавічу Мустыгіну.

- У нас усё адпрацавана, праблем ніякіх няма. Цяпер дубль будзе знаходзіцца бліжэй да асновы, мы плануем большае ўзаемадзеянне. Будучыня за нашай моладдзю - толькі так. Я планую сачыць за трэніровачным працэсам дубля, наведваць усе іх гульні. Плюс мне ў гэтым выдатна дапаможа Андрэй Іванавіч Лаўрык, які ў курсе ўсіх спраў.

- Падчас аднаго з нашых інтэрв'ю вы абмовіліся, што было б выдатна, калі б двухбаковых гульняў паміж асновай і дублем было б больш. Варта чакаць гэтага цяпер?

- Зразумела. У тыднёвым цыкле будзем стала звяртацца да такой практыкі. Асабліва, падчас паўзаў у чэмпіянаце. Трэба адсочваць працу моладзі менавіта ў такіх матчах, на фоне асноўнага складу і глядзець як яны растуць. Мяркую, што толькі ў такіх гульнях можна выявіць усе праблемы і нюансы падрыхтоўкі моладзі. Плюс, гэта будзе неблагая практыка для тых дзяцей асноўнага складу, хто атрымлівае крыху гульнявога часу.

- Ці плануюцца змены ў трэнерскім штабе?

- Пакуль мы мяняем трэнера брамнікаў, ім стане Аляксандр Марцешкін. А далей - час пакажа.