У Гомельскай вобласці знойдзены новы від грыбоў

Новы від атрымаў назву Capronia suijae.

У Гомельскай вобласці выяўлены новы від грыбоў - такое адкрыццё зрабілі біёлагі Гомельскага дзяржаўнага ўніверсітэта імя Ф. Скарыны ў працэсе вывучэння расліннага свету рэгіёну, паведаміў БелТА аўтар даследавання - навуковец з ГДУ Андрэй Цурыкаў.

Аналізуючы сабраны ў Жыткавіцкім раёне матэрыял лішайнікаў і ліхенафільных грыбоў, біёлаг выявіў унікальны ўзор невядомага навуцы віду. Для ідэнтыфікацыі знаходкі спатрэбілася яе дбайнае вывучэнне ў лабараторных варунках.

"Гэта невялікі грыб, які расце на слаявішчы лішайніку і практычна непрыкметны няўзброеным вокам, - адзначыў біёлаг. - Пакуль яшчэ не зразумела, ці з'яўляецца ён паразітам".

Як распавёў Андрэй Цурыкаў, новы від атрымаў назву Capronia suijae паводле імені Аве Суйі - спецыялісткі ў грыбах і лішайніках з Тартускага ўніверсітэта, якая падтрымала гомельскага навукоўца ў ягоных даследаваннях.

Са слоў суразмоўцы, артыкул, прысвечаны дэталёваму апісанню адкрыцця, апублікаваны ў часопісе Кэмбрыджскага ўніверсітэта The Lichenologist, які ўваходзіць у найбуйнейшую бібліяграфічную і рэфератыўная навуковую базу звестак Scopus.