Пад Барысавам аўтаінспектары падчас пагоні стралялі па колах «жыгулёў»
4- 8.05.2017, 19:09
- 20,436
Экіпаж ДАІ са стралянінай спыняў п'янага кіроўцу ў Барысаўскім раёне.
Пра гэта паведамляе БелТА са спасылкай на прадстаўніка ДАІ МУС Станіслава Салаўя.
Інцыдэнт адбыўся ўвечары 7 траўня паблізу вёскі Глівін пад Барысавам. Супрацоўнікі ДАІ заўважылі «жыгулі» без нумароў, якія ехалі ў бок Беразіно. Кіроўцу былі пададзеныя сігналы аб прыпыненні, якія ён праігнараваў і прадоўжыў рух. Пачалася пагоня.
- Падчас пераследу кіроўцу неаднаразова выстаўляліся патрабаванні аб спыненні, аднак ён іх таксама ігнараваў, ствараючы пры руху рэальную пагрозу жыццю і здароўю людзей, - распавёў Салавей. - Супрацоўнікамі ДАІ былі зробленыя папераджальныя стрэлы, на якія кіроўца таксама не звярнуў увагі.
Інспектарам давялося страляць па колах аўтамабіля.
Як высветлілася пасля затрымання, за стырном быў п'яны 32-гадовы мужчына. На яго склалі некалькі пратаколаў.