Сталі вядомыя падрабязнасці начнога рэйду на Зыбіцкай

Чыноўнікі з розных інстанцый разам з АМАПам шукалі замежнікаў, якія працуюць нелегальна.

Уначы з 9 на 10 чэрвеня на Зыбіцкую зазірнулі прадстаўнікі некалькіх дзяржаўных органаў. Са слоў уладальнікаў устаноў, летась такі маніторынг на Зыбіцкай ужо праводзілі: тады гарадскія ўлады засталіся задаволены функцыянаваннем барнай вуліцы.

- Уначы, ужо пасля 23 гадзіны, да нас прыйшоў натоўп чыноўнікаў з розных інстанцый: гарадская адміністрацыя, санстанцыя, супрацоўнікі аддзела грамадзянства і міграцыі, пажарныя, АМАП, - распавядае адзін з гаспадароў бараў, які быў у той момант ва ўстанове.

З ягоных слоў, правяраючых цікавіла захаванне рэжымаў працы бараў.

- Ва ўсіх установах узгоднены розны рэжым. У цэлым глядзелі, што адбываецца, нешта запісвалі, фатаграфавалі, але ва ўстановах заходзілі толькі прадстаўнікі міграцыйнай службы з АМАПам, шукалі замежнікаў, якія працуюць нелегальна, - каментуе суразмоўца.

Саўладальнік іншага бара, які таксама ў гэты вечар быў на Зыбіцкай, распавядае, што канкрэтна ў яго ўстанове пыталіся пра ўкраінцаў і казахаў, якія працуюць незаконна.

- У адным з бараў, дзе ёсць кальян, у кальяншчыка-беларуса пыталіся дакументы.

Паводле інфармацыі tut.by, напярэдадні некалькі ўстаноў з будынка на Зыбіцкай, 6 атрымалі прадпісанні аб змене рэжыму працы да 23 гадзін. Са слоў гаспадароў устаноў, скарачэнне часу працы тлумачыцца тым, што ў раёне барнай вуліцы пагоршылася крымінагенная абстаноўка: непадалёк ад піцейных устаноў зафіксавана вялікая колькасцю правапарушэнняў.

- Але гэта смешна, каб бар працаваў да 23 гадзін. Мы ўсе працуем у асобным будынку, ён нежылы. У любым выпадку, будзем чакаць вынікаў маніторынгу, - сказаў на заканчэнне суразмоўца.