22 лiстапада 2017, Серада, 10:10

Міністэрства аховы здароўя скараціла перамены ў школах дзеля графіка «пад Колю»

9
Ілюстрацыйнае ФОТА

Карэкціроўкі закранулі перапынкі паміж першай і другой зменамі.

Пастановай Міністэрства аховы здароўя РБ ад 17 траўня гэтага года №35 унесены змяненні і дапаўненні ў санітарныя нормы і правілы «Патрабаванні для ўстаноў агульнай сярэдняй адукацыі», зацверджаныя ў 2012 годзе. З улікам больш позняга пачатку заняткаў у першую змену, каб забяспечыць іх завяршэнне да 19.30, паменшаныя да «не менш за 15 хвілін» перапынкі паміж першай і другой зменамі, піша www.b-g.by.

Раней пры арганізацыі адукацыйнага працэсу ў 2 - 11 класах яны прадугледжваліся працягласцю не менш за 20 хвілін. У старой рэдакцыі пастановы замест вялікай перамены 30 хвілін маглі быць дзве, пасля другога і трэцяга урокаў, па 20 хвілін. Зараз гэты мінімум скараціўся да 15 хвілін. Гэты абзац цяпер выкладзены так: «працягласцю не менш за 15 хвілін у колькасці, неабходнай для арганізацыі гарачага харчавання вучняў з улікам колькасці навучэнцаў ва ўстанове адукацыі і месцаў у абеднай залі, але не менш за дзве для магчымасці арганізацыі дынамічнай перамены». Нагадаем, што карэкціроўкі спатрэбіліся ў сувязі з пераглядам часу пачатку заняткаў у школах.

А гэта, у сваю чаргу, адбылося праз тое, што 12 траўня Лукашэнка сказаў: «Раней 9 раніцы ўрокі пачынаць не трэба». Змены закранулі таксама нормы плошчы, абсталявання розных памяшканняў, арганізацыі пітнога рэжыму, раскладу вучэбных заняткаў, распарадку дня і інш.