Расейская бронетэхніка зладзіць марш-кідок да Берасця
30- 16.06.2017, 15:15
- 20,801
Вайсковая тэхніка таксама праедзе праз Воршу, Менск і Бярозу.
Першы бронепрабег маршрутам Масква - Берасце - Масква стартуе 17 чэрвеня ў расейскай сталіцы, паведамілі карэспандэнту агенцтва «Мінск-Навіны» ў расейскай Міжрэгіянальнай грамадскай арганізацыі садзейнічання вывучэнню і эксплуатацыі вайсковай тэхнікі «Вайскова-тэхнічнае таварыства».
Больш за 15 адзінак дэмілітарызаванай тэхнікі, у тым ліку БТР і БРДМ, адправяцца ад Паклоннай Гары маршрутам Масква - Адзінцова - Галіцына - Мажайск - Вязьма - Смаленск - Ворша - Менск - Берасце - Бяроза - Масква. Удзельнікі мерапрыемства плануюць усталяваць рэкорд, які ўвойдзе ў Кнігу рэкордаў Расеі як самы працяглы марш-кідок, здзейснены на адноўленай бронетэхніцы XX стагоддзя. Будзе пераадолена звыш 2 300 км шляху.
Кульмінацыяй бронепробегу стануць памятныя мерапрыемствы ў Берасці 22 чэрвеня. Усяго іх падчас марш-кідка па тэрыторыі Расеі і Беларусі плануецца правесці дваццаць.
Акцыя атрымала падтрымку мэрыі Масквы. Ва ўрачыстай цырымоніі старту возьмуць удзел прадстаўнікі дыпламатычных місій краін СНД. Бронепрабег пройдзе пры падтрымцы Маскоўскага Патрыярхата Рускай Праваслаўнай царквы, Гісторыка-культурнага комплексу «Лінія Сталіна» (Беларусь), Беларускага рэспубліканскага саюза моладзі.