Як Качанава, якая атрымала пляц у «Драздах», вучыла жыццю беларусаў

Кіраўніца адміністрацыі Лукашэнкі Беларусі Наталля Качанава правяла 17 чэрвеня прыём грамадзян у Верхнядзвінску.

Як паведамляе БелТА, замест запланаваных дзвюх гадзін прыём доўжыўся амаль чатыры. Сярод пытанняў, якія хвалявалі грамадзян, што звярнуліся да яе, былі праблемы сферы ЖКГ, арганізацыі дарожнага руху і іншыя. Аднак больш за ўсё звярнула на сябе пытанне аб жыллі для шматдзетных, піша «Салідарнасць».

- Вядома, ёсць праблемы, якія неабходна развязваць на ўзроўні міністэрстваў і рэспубліканскіх структур. Адна з іх агучаная сёння, - забеспячэнне жыллём шматдзетных сем'яў. Урад ужо ўжыў пэўныя захады для забеспячэння шматдзетных сем'яў жыллём і павелічэння крэдытных рэсурсаў на гэты год, але ў такіх невялікіх гарадах, як Верхнядзвінск, дзе некалькі гадоў не будуецца шматкватэрнае жыллё, гэтае пытанне развязаць досыць няпроста. Я думаю, трэба яшчэ прапрацоўваць гэтую тэму на ўзроўні міністэрстваў, - сказала кіраўніца адміністрацыі Лукашэнкі.

Пры гэтым Наталля Качанава адзначыла, што няправільна было б у развязанні праблемы забеспячэння жыллём спадзявацца толькі на дзяржаву.

- Калі казаць аб невялікіх гарадах, то тут сёння ёсць магчымасць вылучыць зямельны пляц для шматдзетных сем'яў. Яго гатовыя даць, ёсць крэдытныя рэсурсы, але сем'і не могуць будаваць, бо, да прыкладу, хтосьці не працуе, - сказала яна. - Не толькі дзяржава павінна паклапаціцца аб шматдзетных сем'ях, але і самі людзі павінны ўжываць захады.

У гэтай сувязі характэрна, што сама Наталля Качанава будуе катэдж у элітным пасёлку «Дразды-2» у Менску. Як паведамляла «Наша ніва», пляц пад будаўніцтва дома плошчай блізу 15 сотак быў выдзелены пастановай Менгарвыканкама №3058 ад 13 кастрычніка 2016 года.

Нагадаем, зямля пад будаўніцтва катэджаў у Менску размяркоўваецца наступным чынам: спачатку яе павінны прапанаваць шматдзетным сем'ям з чаргі. Калі ахвотных няма, надзел выстаўляецца на аўкцыён. Ні ў якім прававым акце не сказана, што Наталля Качанава мае першачарговае права на будаўніцтва ў сталіцы.

Што ж тычыцца шматдзетных сем'яў, то пасля заяваў чыноўніцы, думаецца, наўрад ці ў каго-небудзь з іх яшчэ застануцца ілюзіі з нагоды жыцця ў самай сацыяльна арыентаванай дзяржаве.