У Горадні прайшла акцыя памяці Васіля Быкава
- 19.06.2017, 19:07
- 15,100
Жыхары горада ўспомнілі творчасць, палітычную і грамадскую дзейнасць вялікага беларускага пісьменніка.
У адзіным у Горадні грамадскім музеі знакамітага беларускага пісьменніка Васіля Быкава прайшла акцыя памяці, паведамляе «Радыё Рацыя». Сёння вялікаму пісьменніку магло споўніцца 93 гады.
Музей знаходзіцца на адной з цэнтральных вуліц абласнога цэнтра - Савецкай.
Гарадзенцы прыйшлі ўспомніць творчасць, палітычную і грамадскую дзейнасць Васіля Быкава. У кожнага была магчымасць выступіць.
- Проста пастаім у гэтым пакоі, дзе жыве дух вялікага пісьменніка, які чвэрць стагоддзя хадзіў па гарадзенскіх вуліцах і пісаў у гэтым горадзе свае сусветна вядомыя кнігі. Быкава па праву называюць геніяльным, але для нас ён вельмі блізкі, звычайны, бо ён тут жыў, ён вельмі любіў гэты горад, - кажа прафесар Аляксей Пяткевіч.
Удзельнікі імпрэзы выказалі здзіўленне, што ідэя аб перайменаванні вуліцы Парыжскай камуны, дзе жыў і працаваў народны пісьменнік Беларусі дагэтуль не атрымала падтрымкі ў гарадзенскіх уладаў.