Як у Адэсе стваралі Беларускую дывізію
- 22.06.2017, 12:50
- 25,168
Камандаваў дывізіяй беларускі вайсковец і дыпламат, генерал Павел Вент.
17 чэрвеня 1880 у Менскай губерні нарадзіўся генерал Павел Вент, беларускі вайсковец і дыпламат. Нарадзіўся ў шляхецкай лютэранскай сям'і, піша сайт radabnr.org.
Скончыў Кадэцкі корпус, Міхайлаўскую артылерыйскую вучэльню, Электра-тэхнічныя курсы (інстытут), Вайскова-аўтамабільную школу, Мікалаеўскую вайсковую акадэмію з дадатковым курсам Генеральнага штаба.
Падчас Грамадзянскай вайны ў Расеі быў начальнікам штабу Заходняга войска, камандзір Крымскага коннага палка.
Пасля выдзялення, са згоды французаў, урадам Украінскай народнай рэспублікі сродкаў на фармаванне беларускіх вайсковых часцей, у Адэсе пачалося фармаванне Беларускай дывізіі, яе камандзірам быў прызначаны Павел Вент, якому неўзабаве прысвоілі генеральскі чын. Пасля ён стаў не толькі камандзірам Беларускай дывізіі на поўдні Расеі, але і прадстаўніком БНР пры штабе войскаў антыбальшавіцкай кааліцыі.
Падчас эвакуацыі ў канцы сакавіка - пачатку красавіка 1919 г. французаў і «белых» з Адэсы, павінна была эвакуявацца і Беларуская дывізія, аднак камандзір дывізіі Павел Вент застаўся ў Адэсе.
Бальшавікі на базе дывізіі пачалі фармаванне беларускай савецкай брыгады, якая хутка налічвала ўжо 10 тысяч байцоў, камандаваў брыгадай генерал Павел Вент.
Нацыянальна настроеныя беларускія афіцэры выступалі за перадыслакацыю брыгады ў Менск, але гэта не было дазволена. Неўзабаве ў Адэсе пачалося паўстанне Грыгор'ева, да якога далучыўся і Павел Вент. Пасля падаўлення паўстання Вент з'ехаў з Адэсы.
Пазней Вент быў інструктарам Генеральнага штаба літоўскага войска і вайсковым дарадцам пры Вайскова-дыпламатычнай місіі БНР у Эстоніі і Латвіі, генерал-маёрам БНР.
Быў асабіста ўпаўнаважаны Радай народных міністраў БНР весці перамовы з урадам Эстоніі пра прызнанне Эстоніяй незалежнасці БНР і пра пасрэдніцтва Эстоніі ў перамовах з урадам Савецкай Расеі. У рамках сваёй працы Вент вёў перапіску з камандзірам Асобнага атрада БНР у Эстоніі - генералам Станіславам Булак-Балаховічам у пытаннях фармавання атрада.