Мядзведзь адвадзіў жыхароў Быхаўскага раёна хадзіць па грыбы і ягады
4- 23.06.2017, 9:50
- 14,201
Звер падыходзіць да вёсак на адлегласць 300 метраў.
Жыхары вёсак Галееўка і Кароткія Быхаўскага раёна на лясной дарозе ўбачылі сляды мядзведзя і занепакоеныя, бо месца багатае на грыбы і ягады, паведамляе tvrmogilev.by.
Некаторыя кажуць, звер хадзіў за 300-500 метраў ад ускраіны вёскі Кароткія, а гэты населены пункт прымыкае да лесу.
У Магілёўскім абласным лесагаспадарчым аб'яднанні пацвердзілі, мядзведзь жыве ў лясах Магілёўшчыны. На спячку ён залягае ў Клічаўскім раёне. Цалкам магчыма, кажуць паляўніцтвазнаўцы, ён можа хадзіць і ў быхаўскіх лясах, але там яго логава ніхто пакуль не сустракаў. Гэты звер, ўдакладняюць спецыялісты, сам пазбягае ўсялякіх кантактаў з людзьмі. Таму па грыбы і ягады раяць хадзіць кампаніяй і гучна размаўляць.
Да ведама: паляванне на мядзведзяў у нашай краіне забароненае з 1930-х гадоў. Гэты від жывёл уключаны ў 1-е (1981) і 2-е (1993 г.) выданне Чырвонай кнігі Беларусі.