Арцыбіскуп Клаўдыё Гуджэроці: Беларусь па-ранейшаму застаецца глыбока ў маім сэрцы
1- 25.06.2017, 18:12
- 24,694
Беларусь узнагародзіла ордэнам Францыска Скарыны былога амбасадара Ватыкана.
Арцыбіскуп Клаўдыё Гуджэроці, які цяпер з'яўляецца Апостальскім нунцыем ва Украіне, атрымаў у Кіеве ад уладаў Беларусі ордэн Францыска Скарыны – «за значны асабісты ўнёсак у развіццё культурнай спадчыны паміж Беларуссю і Ватыканам», паведамляе «Белсат».
Арцыбіскуп Гуджэроці быў прадстаўніком Апостальскай сталіцы ў Беларусі з 15 ліпеня 2011 года да 13 лістапада 2015 года.
Гуджэроці вывучаў беларускую мову, служыў імшу па-беларуску, а таксама неаднаразова заклікаў беларускіх вернікаў і духавенства шанаваць і абараняць беларускую мову.
Таксама прадстаўнік папы вызначыўся апекай над зняволенымі ў Беларусі. Іерарх наведваў палітычных зняволеных: Алеся Бяляцкага, Міколу Статкевіча, Змітра Дашкевіча, Паўла Севярынца, Сяргея Каваленку, Паўла Сырамалотава, Эдуарда Лобава. Арцыбіскуп перадаў ім прывітанне святога айца і каталікоў і паведаміў вязням, што Каталіцкая царква моліцца за іх і іхнія сем'і.
Апостальскі нунцый кожны год бываў у Курапатах, дзе бальшавікі расстралялі дзясяткі тысячаў жыхароў Беларусі. У Курапатах і ў Трасцянцы арцыбіскуп маліўся за загінулых і зніклых сыноў і дачок Беларусі, а таксама і за будучыню яе дзяцей.
Узнагароду іерарху ўручыў амбасадар Беларусі ва Украіне Ігар Сокал. У мерапрыемстве ўдзельнічаў мітрапаліт менска-магілёўскі арцыбіскуп Тадэвуш Кандрусевіч.
Цырымонія прайшла ў Кіеўскім нацыянальным акадэмічным тэатры оперы і балета.
«Беларусь па-ранейшаму застаецца глыбока ў маім сэрцы са сваёй годнасцю, сваёй працавітасцю, сваёй гасціннасцю і сваёй цішынёй, якая напоўненая чуллівасцю і глыбінёй. Яна навучыла мяне разуменню таго, што народ вялікі не таму, што пра яго шмат кажуць, і нават не таму, што ён сам кажа пра сябе, а вялікі ён тымі перлінамі, якія захоўваюцца ў ягоным сэрцы», – сказаў у сваім выступе Гуджэроці.
У канцы прамовы арцыбіскуп працытаваў верш Рыгора Барадуліна, адрасуючы словы паэта Беларусі:
Яе ўратавала ейная вера,
Сказаў Ісус.
І ў сэрцы з Ісусам пайшла.
І сталася ў свеце няшэра.
І неба рунела зорным абрусам.