ФСБ: Тэрарысты выкарыстоўвалі Telegram перад выбухам у Пецярбургу

З дапамогай мэсэнджара выканаўцы нібыта атрымлівалі ўказанні ад «куратараў за мяжой».

ФСБ Расеі заяўляе аб актыўным выкарыстанні тэрарыстамі і «іх куратарамі за мяжой» для сувязі мэсэнджара Telegram, у тым ліку падчас тэракту ў метро Санкт-Пецярбурга 3 красавіка, паведамляе interfax.ru.

«Падчас аператыўнага суправаджэння расследавання тэракту 3 красавіка гэтага года ў метрапалітэне Санкт-Пецярбурга ФСБ Расеі атрымана дакладная інфармацыя аб выкарыстанні тэрарыстам-смяротнікам, яго памагатымі і замежным куратарам мэсэнджара Telegram для ўтойвання сваіх злачынных задум на ўсіх стадыях арганізацыі і падрыхтоўкі тэрарыстычнага акту», - сцвярджаецца ў паведамленні Цэнтра грамадскіх сувязяў (ЦГС) ФСБ Расеі, якое паступіў у «Інтэрфакс» у панядзелак.

Ведамства ўказвае, што «падчас аператыўна-вышуковых мерапрыемстваў у выяўленні заканспіраваных груповак міжнародных тэрарыстычных арганізацый фіксуецца татальнае выкарыстанне іх сябрамі інтэрнэт- мэсэнджараў для ажыццяўлення канспіратыўнай сувязі паміж сабой і сваімі куратарамі з замежжа». «Найбольш актыўна сябрамі міжнародных тэрарыстычных арганізацый на тэрыторыі РФ выкарыстоўваецца мэсэнджар Telegram, які дае тэрарыстам магчымасць ствараць сакрэтныя чаты з высокім узроўнем шыфравання інфармацыі», - заяўляюць у ЦГС ФСБ.

Ціск уладаў РФ на Telegram

На мінулым тыдні кіраўнік Раскамнагляду Жараў двойчы публічна выступіў на тэму Telegram. У панядзелак ён паабяцаў звярнуцца да стваральніка мэсэнджара Паўла Дурава з тым, каб той падаў звесткі, неабходныя для ўнясення Telegram у так званы рэестр арганізатараў распаўсюду інфармацыі. У пятніцу Жараў на самай справе апублікаваў на сайце сваёй арганізацыі зварот да Дурава, у якім пісаў: «Час, адведзены Раскамнагляду законам на прыняцце рашэння, мінае. Таму я публічна звяртаюся да каманды Telegram і асабіста Паўла Валер'евіча Дурава: выканаеце расейскае заканадаўства! Выбар за вамі», - гаварылася ў заяве за подпісам Жарава. З ягоных слоў, у выпадку фактычнай адмовы ад выканання абавязкаў арганізатара распаўсюджвання інфармацыі Telegram у Расеі павінен быць заблакаваны.

На гэтую заяву Дураў усё ж такі адрэагаваў, назваўшы ініцыятыву ведамства «сабатажам дзяржаўных інтарэсаў». «Парадаксальна, што на парадку дня ў Расеі няма блакавання кантраляваных ЗША Whatsapp або Facebook Messenger, але актыўна абмяркоўваецца блакіроўка нейтральнага ў дачыненні да Расеі Telegram. Як толькі Telegram блакуецца, перапіска расейскіх чыноўнікаў, іх зносіны з сябрамі і сваякамі і іншыя адчувальныя звесткі праз WhatsApp/Viber пяройдуць у падкантрольныя Амерыцы аблокі Apple iCloud/Google Drive», - напісаў ён.

На гэтым абмен думкамі не скончыўся, і Жараў публічна паскардзіўся на Дурава, папракнуўшы таго ў «нейтральным дачыненні да тэрарыстаў». Дураў жа нагадаў чыноўніку, што Telegram апрацоўвае запыты на выдаленне тэрарыстычных матэрыялаў з усяго свету - і ні ў адной краіне Telegram не быў заблакаваны праз «нейтральнасць» у гэтым пытанні.