Міклаш Харашці больш не будзе спецдакладчыкам ААН аб Беларусі
3- 26.06.2017, 14:07
- 10,691
Пасля падаўжэння мандата на год пачалася працэдура прызначэння новага спецдакладчыка.
Міклаш Харашці не будзе спецдакладчыкам ААН у правах чалавека ў Беларусі. І гэта нягледзячы на падаўжэнне мандата спецдакладчыка яшчэ на год. Пра гэта «Радыё Рацыя» паведаміў праваабаронца з цэнтру «Вясна» Уладзімір Лабковіч.
З ягоных слоў, цяпер пачынаецца працяглая працэдура прызначэння новага спецдакладчыка:
«Трэба адзначыць тое, што, на жаль, сам Міклаш Харашці ўжо не зможа балатавацца на гэтую пасаду. Ён у межах той працэдуры, якая ёсць, усё тэрміны вычарпаў. Але добра ўжо тое, што мандат падоўжаны, гэта ягоная вялікая заслуга, як чалавека, які адказна і бескампрамісна ўжо некалькі гадоў даваў ацэнку сітуацыі з правамі чалавека ў Беларусі».
Беларускія ўлады вельмі нервова ставяцца да пасады спецдакладчыка ААН і падрыхтаваным ім дакументах аб захаванні правоў чалавека ў Беларусі.
Напярэдадні чарговага галасавання ў ААН Беларусь заклікала скасаваць мандат спецдакладчыка. Гэтую ініцыятыву падтрымалі Расея, Нікарагуа, КНДР, Лаос, Таджыкістан, Кітай і шэраг іншых краін.