Названыя пяць прадуктаў, якія дапамогуць арганізму лягчэй пераносіць спякоту
2- 27.06.2017, 14:10
- 10,444
У спякоту трэба ўжываць прадукты, якія дапамагаюць нармалізаваць водны баланс, астудзіцца.
Калі спякота літаральна выцягвае з арганізма ўсе сілы, а ад колькасці выпітай вадкасці ўжо проста ванітуе, варта звярнуць увагу, ці дастаткова вы спажываеце прадуктаў з наступнага спісу.
Ivona піша пра пяць летніх прадуктаў, якія адрозніваюцца не толькі шырокім спектрам вітамінаў, але і дапамагаюць хутка нармалізаваць водны баланс, астудзіцца, а пры рэгулярным ужыванні нават скінуць лішнюю вагу.
Агуркі
У агурках змяшчаецца вялікая колькасць вадкасці. Аднак галоўная іх якасць - абалоніна і асаблівыя ферменты, якія стымулююць страваванне. Агуркі жывяць скуру і абараняюць яе ад уздзеяння ультрафіялету. Гэта гародніна нават можа палягчаць боль пры сонечных апёках.
Кавун
Кавун багаты вітамінамі, антыаксідантамі і абалонінай. Ён на 90% складаецца з вады, таму з'яўляецца добрым варыянтам для здаволення смагі. У адрозненне ад сокаў, напояў і газаванай вады, кавун не ўтрымлівае столькі цукру, які патрабуе выпрацоўкі інсуліну, а значыць, ужываць яго можна нават дыябетыкам.
Ягады
Ягады - сакавіты, салодкі і да ўсяго гэтага неймаверна смачны прадукт, які можна ўжываць з рознымі дадаткамі і дадаваць у вялікую колькасць страў. Яны ўключаюць шмат неабходных арганізму пажыўных рэчываў, у тым ліку і ваду. Лідарамі ў колькасці вадкасці сярод ягад з'яўляюцца клубніцы і буякі.
Зеляніна і ліставая салата
Зеляніна, як агуркі і кавун, можа пахваліцца вялікай колькасцю вадкасці ў складзе. У зеляніне ўтрымоўваецца вялікая колькасць фоліевай кіслаты, вітамінаў А, C і E і розных караціноідаў, якія павышаюць натуральную абарону ад ультрафіялетавага выпраменьвання.
Кабачкі
Кабачкі не толькі смачныя і пажыўныя, але і лёгкія для стрававання, яны выдатна засвойваюцца і ўзбагачаюць арганізм вітамінамі С, А, важнымі мікраэлементамі, каліем, кальцыем, жалезам і магніем. Кабачкі здольныя выводзіць з арганізма шкодныя рэчывы і таксіны.