«Хочаце прывезці з адпачынку 6 кг абрыкосаў? Гэта процьма выдаткаў!»

Атрымаць фітасанітарны сертыфікат па месцы адпраўлення грузу амаль нерэальна.

У пастанове Савета Еўразійскай эканамічнай камісіі напісана, што з 1 ліпеня на тэрыторыю краін ЕАЭС (Беларусь, Расея, Арменія, Казахстан, Кыргызстан) адзін чалавек можа прывезці да 5 кг гародніны і садавіны. Калі аб'ёмы перавышаныя, патрэбен фітасанітарны сертыфікат, піша kp.by.

Што і як будуць кантраляваць? Адзін чалавек (кожнага ўзросту, у тым ліку і немаўля) за адзін раз перасячэння мяжы з 1 ліпеня можа завезці да 5 кг гародніны і садавіны. Сюды ж уваходзяць арэхі, бабовыя, ягады і грыбы. Калі норма перавышаная, з вас запатрабуюць фітасанітарны сертыфікат. Напрыклад, мама, тата і дзіця едуць з Літвы і вязуць 10 кг чарэшні. Тут усё добра, могуць праязджаць. Калі вы едзеце адзін і везяце 10 кг чарэшні, то з вас запатрабуюць паперку, якая пацвярджае бяспеку ягады. Калі вы па дарозе з Адэсы ў адзіночку наважылі прывезці кавун вагой 8 кг, вам таксама будзе патрэбен сертыфікат. Калі гэты ж самы кавун вы будзеце везці ўдваіх, сертыфікат не спатрэбіцца. Лішкі без сертыфікатаў на мяжы будуць адбіраць і знішчаць.

У дакуменце гаворка ідзе аб перасячэнні мяжы ЕАЭС - для беларусаў гэта найбліжэйшыя Украіна, Польшча, Літва, Латвія. Калі вы едзеце з Расеі ці раптам ляціце на самалёце з Алма-Аты і везяце адтуль 6 кг гародніны і садавіны, то ніякага сертыфіката на іх не трэба. А вось калі з Гішпаніі наважылі 10 кг артышокаў прывезці, то сертыфікат ужо спатрэбіцца. Абмежаванні дзейнічаюць пры ўсякім перасячэнні мяжы, у тым ліку і на самалёце.

Праўда, з сертыфікатам ёсць пытанні. У Галоўнай дзяржаўнай інспекцыі насенняводства, каранціну і аховы раслін Беларусі кажуць, што фітасанітарны сертыфікат выдаецца па месцы адпраўлення грузу або яго вырошчвання. Напрыклад, у Кіеве ідзяце да інспектара па каранціну раслін і кажаце: дайце сертыфікат на мяшок абрыкосаў. У вас прымаюць заяву, даглядаюць прадукцыю на наяўнасць хвароб, уключаных у адзіны пералік ЕАЭС. Калі ўсё чыста, выдаюць дакумент, які вы на мяжы і паказваеце. Фактычна ўсё больш складана.

- На экспэртызу і выдачу сертыфіката сыходзіць да двух дзён, - распавялі «КП» у Дзяржаўнай ветэрынарнай і фітасанітарнай службе Украіны. - Мы не працуем з фізічнымі асобамі. Але нават калі выказаць здагадку, што мы возьмемся афармляць вам сертыфікат, то не зможам праверыць прадукт паводле ўсіх патрабаванняў, якія прапісаны ў дакуменце ЕАЭС. Акрамя таго, з часткай тавару вам давядзецца расстацца. Гэта значыць, вы купілі 6 кг чарэшні - паўкіло аддасце незваротна ў лабараторыю. Сертыфікат каштуе 45 грыўняў 30 капеек ($1,74. - заўв.), прыкладна столькі ж - экспэртыза. Наша парада: не марнуйце час і грошы, лепш упісвацца ў нормы.

Вязеш кветкі? Да трох букетаў па 15 кветак у кожным.

Згодна з новымі нормамі, зрэзаных кветак можна ўвозіць максімум 3 букеты аднаму чалавеку. Прычым у кожным букеце можа быць да 15 штук кветак, сцеблаў, травінак і г.д., у тым ліку і засушаных. Калі аб'ёмы перавышаныя, то і ў гэтым выпадку будзе патрэбны фітасанітарны сертыфікат.

Дарэчы, а кветкі ў гаршках завозіць па-ранейшаму забаронена - нават калі ў вас будзе на іх чэк з крамы. Гэта ж тычыцца цыбулін, клубняў раслін і насення.