У польскім Кракаве з'явіцца метро

ЕЗ выдзеліў гораду €2,5 мільёна на падрыхтоўку да будаўніцтва.

Адпаведныя сродкі на тэхніка-эканамічнае абгрунтаванне першай лініі метрапалітэна ў Кракаве вылучыла Еўрапейская камісія, паведамляе «Радыё Польшча».

Кракаў атрымаў больш за 2,5 млн еўраў на падрыхтоўку да будаўніцтва метро. Адпаведныя сродкі на тэхніка-эканамічнае абгрунтаванне першай лініі метрапалітэна ў Кракаве вылучыла Еўрапейская камісія ў рамках праекта «Злучаючы Еўропу».

Распрацоўка тэхніка-эканамічнага абгрунтавання дапаможа вызначыць, на які маршрут павінна быць рэалізаваная інвестыцыя.

У пытаннях тэндэру на падрыхтоўку тэхніка-эканамічнага абгрунтавання горад мае намер кансультавацца з кіраўніцтвам венскага метрапалітэна, навукоўцамі з Горна-металургічнай акадэміі і Кракаўскай Палітэхнікі, а таксама праекціроўшчыкамі варшаўскага метро і галоўным ваяводскім кансерватарам помнікаў гісторыі.

За стварэнне ў Кракаве метро мясцовыя жыхары прагаласавалі падчас рэферэндуму ў 2014 годзе. Гэтую ідэю тады падтрымалі 55% гараджан, што ўдзельнічалі ў галасаванні.