Амбасадар Канады: У Беларусі вельмі высокі ўзровень развіцця хакея

Стывен дэ Бор падзяліўся сваім меркаваннем наконт развіцця беларускага хакея.

У Беларусі вельмі высокі ўзровень развіцця хакея. Такое меркаванне ў інтэрв'ю БелТА выказаў пасол Канады ў Польшчы і ў сумяшчальніцтве ў Беларусі Стывен дэ Бор, піша tut.by.

- У нас у Канадзе склалася ўражанне, што ў Беларусі вельмі высокі ўзровень развіцця хакея. Мы прызнаем, што тут ёсць добрыя гульцы, і думаем пра Беларусь як пра моцную краіну ў гэтым пытанні, - адзначыў дыпламат.

Рэагуючы на рэмарку, што, на жаль, беларускім хакеістам не заўсёды атрымліваецца перамагчы ў сваіх спаборнікаў, Стывен дэ Бор сказаў:

- Вы, напэўна, хацелі, каб беларуская каманда перамагла Канаду ... Што ж, час ад часу некаторым гэта ўдаецца.

Пасол прызнаўся, што не з'яўляецца зацятым заўзятарам, але глядзіць тыя матчы, якія ўважае за найбольш важныя, - фіналы Кубка Стэнлі, матчы Алімпійскіх гульняў - як з удзелам мужчынскіх каманд, так і жаночых.

- Думаю, што ўся Канада замірае, калі на тэлевізіі паказваюць алімпійскі хакей, - дадаў ён.

На двух запар мінулых чэмпіянатах свету каманда Беларусі не здолела прабіцца ў чвэрцьфінал і змагалася за выжыванне ў элітным дывізіёне. На ЧС-2016 у Санкт-Пецярбургу беларусы фінішавалі 12-мі, на ЧС-2017 у Парыжы - 13-мі. У сусветным рэйтынгу каманда Беларусі займае 10-е месца.