Супраць Марын Ле Пэн распачатае расследаванне пра злоўжыванні
3- 30.06.2017, 18:07
- 20,707
Абвінавачванні звязаныя з аплатай памочнікаў пракрамлёўскага палітыка са сродкаў Еўрапарламента.
Французскія ўлады абвясцілі аб пачатку афіцыйнага расследавання ў дачыненні да лідара крайне правай партыі «Нацыянальны фронт» Марын Ле Пэн, паведамляе расейская служба BBC.
Яе падазраюць у злоўжыванні даверам.
Як паведаміў адвакат Ле Пэн, абвінавачванні звязаныя з аплатай яе памочнікаў са сродкаў Еўрапарламента. Паводле звестак французскай пракуратуры, паплечнікі Ле Пэн па партыі незаконна выдаткавалі на гэтыя мэты мільёны еўраў.
Марын Ле Пэн была адной з галоўных кандыдатак на пасаду прэзідэнта Францыі. Яна здолела выйсці ў другі тур, дзе з вялікім разрывам саступіла цэнтрысту Эмануэлю Макрону.
У лютым пракуратура Францыі вылучыла папярэднія абвінавачванні супраць паплечніка кандыдата ў прэзідэнты краіны Марын Ле Пэн. Паводле версіі следства, бізнэсовец Фрэдэрык Шатыён выдаў партыі незаконную пазыку.
Раней найбліжэйшай памочніцы лідара «Нацыянальнага фронту» Кацярын Грызе былі выстаўленыя абвінавачванні ў атрыманні грошай у рамках іншага расследавання.
Незадоўга да гэтага ў штабе гэтай ультраправай партыі прайшоў ператрус паводле справы аб выдаткоўванні сродкаў Еўрапарламента.
Партыя адмаўляе дачыненне да махінацый, а сама Марын Ле Пэн называе абвінавачванні «палітычна матываванымі».