Карупцыйны скандал у Віцебску: галоўны бухгалтар аддзела адукацыі, спорту і турызму пад вартай

Жанчына не прызнала віну і адмовілася даваць паказанні.

У Віцебску ўзятая пад варту галоўны бухгалтар аддзела адукацыі, спорту і турызму Віцебскага гарвыканкама. Жанчыну абвінавачваюць у шэрагу карупцыйных злачынстваў, піша kp.by.

- Яна больш за тры гады вызначала сумы свайго прэміявання за кошт пазабюджэтных сродкаў, заробленых установамі адукацыі і фізічнай культуры, давала незаконныя ўказанні падначаленым уключаць яе ў загады аб прэміяванні, уносіла заведама ілжывыя звесткі ў афіцыйныя дакументы, - распавяла афіцыйная прадстаўніца УСК Віцебскай вобласці Святлана Сахарава.

51-гадовая жанчына абвінавачваецца ва злоўжыванні службовымі паўнамоцтвамі, што пацягнула цяжкія наступствы, крадзяжы шляхам злоўжывання службовымі паўнамоцтвамі, унясенні заведама непраўдзівых звестак і запісаў у афіцыйныя дакументы. Яна не прызнала сваю віну, адмовілася ад дачы паказанняў і не кампенсавала прычыненую шкоду. На маёмасць абвінавачанай накладзены арышт.