Мінбуд: Скасаванне ўказа пра дапамогу шматдзетным было заўчасным

Міністр архітэктуры і будаўніцтва папрасіў прабачэння за ляп Лукашэнкі.

«Скасаванне ўказа № 585 было заўчасным, гэта была сур'ёзная памылка», – сказаў сёння на сустрэчы з журналістамі міністр архітэктуры і будаўніцтва Анатоль Чорны, паведамляе tut.by.

– Адмена 585 указа не мела сэнсу з 6 жніўня, тэрміну, які мы пазначылі ў новым дакуменце. Мы не змаглі прадугледзець, што пэўная катэгорыя людзей, якая планавала свае бюджэты на будаўніцтва жылля, ударыцца ў скалу неразумення. Трэба прызнаць, што гэта сур'ёзная памылка і мы прыносім свае прабачэнні. Сёння падрыхтаваны мой зварот да кіраўніка дзяржавы падоўжыць дзеянне 585 указа на перыяд заканчэння будаўніцтва дамоў, пачатых будаўніцтвам да прыняцця 240 указа, – распавёў Анатоль Чорны.

Міністр адзначыў, што падоўжана дзеянне 585 указа будзе не больш чым да 1 квартала 2018 гады – за гэты час усе дамы, у якіх будаваліся сем'і, якія прэтэндуюць на субсідыі паводле гэтага ўказа, будуць уведзеныя ў эксплуатацыю.

Сродкі на субсідаванне грамадзянаў паводле 585 указа адшукаць магчыма, удакладніў міністр: – Праблема развязаная, я думаю, кіраўнік дзяржавы падтрымае маю просьбу прадоўжыць тэрмін дзеяння 585 указа.

Нагадаем, на мінулым тыдні прэзідэнт падпісаў новы ўказ № 240 пра адрасныя субсідыі на жыллё, які пачне дзейнічаць з 6 жніўня. Высветлілася, што разам з ім страціць сілу іншы ўказ – пра дапамогу маладым і шматдзетным сем'ям пры будаўніцтве жылля – № 585.

Маладыя сем'і і шматдзетныя, якія разлічвалі на субсідыі паводле 585 указа і якія ўзялі камерцыйныя крэдыты пад 19–20%, трапілі ў прававую яму – калі да жніўня іх дамы не здадуць, то паводле 585-га ім ужо субсідыі не належаць, а паводле 240-га – яшчэ не належаць (паводле яго субсідуюць у парадку чарговасці). Сем'і, якія ўступілі ў будаўніцтва ў 2016–2017-м гадах маглі б застацца з вялізнымі выплатамі ў крэдытах, якія ўзяць не рызыкнулі б, калі б не надзея на дзяржаву. Субсідыі паводле 585 указа належалі толькі тым, хто браў камерцыйныя крэдыты на жыллё.