Усе сакрэты найноўшага беларускага танка паказалі на відэа
30- 14.07.2017, 18:12
- 29,655
У роліку паказаны працэс зборкі, абсталяванне і магчымасці машыны.
Дзяржаўны камітэт вайсковай прамысловасці апублікаваў першае відэа з выпрабаванняў танка Т-72БМЭ, створанага спецыялістамі 140-га бранятанкавага завода. У роліку паказаныя таксама працэс зборкі, абсталяванне і магчымасці машыны, паведамляе tut.by.
Т-72БМЭ здольны знішчыць усякую цэль на адлегласці да 5,5 кіламэтра. Хуткастрэльнасць 125-мм гарматы дасягае 8 стрэлаў на хвіілну дзякуючы ўжыванню аўтамата набівання.
У параўнанні з папярэднімі мадыфікацыямі павялічылася дакладнасць знішчэння цэляў дзякуючы ўсталяванню аптычна-электроннай сістэмы кіравання агнём «Эса-72У».
Датчыкі, усталяваныя на танку, сочаць за ветрам, атмасфэрным ціскам, тэмпературай, тангажом, становішчам гарматы і тэмпературай набою.
Наяўнасць цеплавізара дазваляе цаляць ва ўсякае надвор'е і час дня на адлегласці да 3500 м.
Наяўнасць дадатковых процікумулятыўных кратаў і экранаў з блокамі дынамічнай броні павышаюць абарону ад гранат і ракет у 1,5-1,8 раза.
Т-72БМЭ абаронены ад хімічнай, біялагічнай зброі, а таксама радыеактыўных рэчываў.
Яшчэ адной асаблівасцю танка стала наяўнасць дапаможнага дызельнага рухавіка, ён патрэбны для ашчады паліўна-змазачных матэрыялаў, а таксама калі баявая машына, напрыклад, знаходзіцца ў схованцы. Дадатковы рухавік дазваляе Т-72БМЭ круціць вежу без удзелу асноўнага сілавога агрэгата, а таксама сілкуе бартавое абсталяванне. Выдатак паліва пры яго выкарыстанні складае 4-5 літраў на гадзіну.
Рухавік В84МС магутнасцю 840 конскіх сіл дазваляе разганяць танк па шашы да 70 км/г, па перасечанай мясцовасці хуткасць трохі ніжэйшая - 50 км/г. Запас хады - 650 км, з дадатковымі бакамі - 850 км.
Водныя перашкоды танку таксама не страшныя: пасля 20-хвіліннай падрыхтоўкі Т-72БМЭ можа фарсаваць рэчку глыбінёй пяць мэтраў. Без падрыхтоўкі баявая машына можа пераадолець брод глыбінёй 1,2 м.