Уласніку таксі «Алмаз 7788» выстаўленае абвінавачванне
21- 17.07.2017, 14:51
- 10,786
Віктар Пузікаў застаецца ў следчым ізалятары.
Начальнік управы Следчага камітэта Менску Дзмітрый Канаплянік заявіў, што дырэктару службы таксі «Алмаз 7788» Віктару Пузікаву выстаўленае абвінавачванне паводле ч 2 арт 243 КК Беларусі (ухіленне ад выплаты падаткаў), паведамляе «Белсат».
«Выстаўленае абвінавачванне ва ўхіленні ад выплаты падаткаў шляхам утойвання, наўмыснага заніжэння падатковай базы і ўнясення загадзя фальшывых звестак у падатковыя дэкларацыі, што пацягнула прычыненне шкоды ў асабліва вялікай суме. Кажучы простай мовай, гэта ўхіленне ад выплаты падаткаў шляхам не адлюстравання ў бухгалтарскім уліку даходу, які паступаў ад кіроўцаў гатоўкай. Пра гэта ў СМІ распавядалі і самі кіроўцы. Папярэдняя шкода бюджэту на гэты момант складае амаль 1,5 млн беларускіх рублёў. У дачыненні да Пузікава выкарыстаная мера стрымання ў выглядзе ўзяцця пад варту», - заявіў Канаплянік.
Прадстаўніца СК Юлія Ганчарова адзначыла на сваёй старонцы ў «Фэйсбуку», што пра змяненне меры стрымання для Пузікава цяпер гаворка не ідзе.
«Без выплаты шкоды складана пра гэта казаць», - адзначыла яна.
Нагадаем, Віктара Пузікава затрымалі 14 чэрвеня ў Менску. Папярэдняе следства праводзіў Камітэт дзяржаўнага кантролю.
У 2015 годзе Віктар Пузікаў заняў 25-е месца ў рэйтынгу самых паспяховых маладых беларускіх бізнэсоўцаў паводле версіі партала probusiness.by.