Парашэнка: Украіна гатовая дапамагчы Малдове вярнуць Прыднястроўе
3- 17.07.2017, 18:15
- 20,102
Украіна гатовая максімальна садзейнічаць аднаўленню тэрытарыяльнай цэласнасці Малдовы.
Пра гэта заявіў прэзідэнт Украіны Пётр Парашэнка падчас супольнага з прэм'ер-міністрам Малдовы Паўлам Філіпам брыфінгу для СМІ, паведамляе прэс-служба ўкраінскага лідара.
«Вельмі ўдзячны ўраду, прэм'ер-міністру, парламенту Малдовы за цвёрдую падтрымку суверэнітэту, тэрытарыяльнай цэласнасці і незалежнасці краіны. Украіна гатовая максімальна садзейнічаць аднаўленню тэрытарыяльнай цэласнасці, суверэнітэту рэспублікі Малдовы», – сказаў Парашэнка.
Паводле паведамлення АП, ён дадаў, што Украіна гатовая рабіць усё магчымае для аднаўлення таго, што 25 гадоў таму было справакаванае і мае цяжкія наступствы для сотняў тысячаў людзей, якія сёння жывуць у Прыднястроўі.
У сваю чаргу прэм'ер-міністр Малдовы распавёў, што раней больш за 70% ад агульных аб'ёмаў гандлёвых аперацыяў Прыднястроўя ажыццяўляліся менавіта праз пункт пропуску «Кучурган-Першамайск». Ён адзначыў, што дзіўна чуць рознага кшталту спекуляцыі з нагоды так званых планаў у ажыццяўленні эканамічнай блакады Прыднястроўя.
«Пра якую блакаду можа ісці гаворка, калі амаль 60% агульнага аб'ёму экспарту з гэтага рэгіёну было ў краіны ЕЗ. Магчыма, гэта не падабаецца некаторым лідарам гэтага рэгіёну, але гэта вельмі трэба для людзей, якія там жывуць», – падкрэсліў Філіп.
Сёння на ўкраінска-малдаўскай мяжы адкрылі супольны кантрольна-прапускны пункт Кучурган-Першамайск.