ДАІ Светлагорска: Не рэкамендуем вешаць георгіеўскія стужкі на аўто
48- 17.07.2017, 20:43
- 28,017
У горадзе невядомы вядзе барацьбу з «рускім светам», пратыкаючы колы аўтамабіляў з георгіеўскімі стужкамі.
У Светлагорску пасля амаль месячнага перапынку невядомыя зноў пачалі рэзаць колы аўтамабіляў, на якіх павязаныя так званыя «георгіеўскія стужкі». Чарговае здарэнне адбылося ў ноч з 15 на 16 ліпеня ў мікрараёне «Маладзёжны», паведамляе «Радыё Свабода».
Паводле словаў кіраўніка Светлагорскага аддзялення ДАІ Васіля Гапоненкі, пашкоджанымі аўтамабілямі займаюцца супрацоўнікі крымінальнага вышуку.
«Георгіеўскія стужкі раздавалі валанцёры падчас мінулых святаў, некаторыя аўтааматары і прычапілі іх на свае аўтамабілі. Мы можам толькі рэкамендаваць кіроўцам гэтага не рабіць. І рэкамендуем», – дадаў кіраўнік ДАІ.
На думку мясцовага грамадскага актывіста, гісторыка Тэльмана Маслюкова, невядомы шкоднік аўтамабіляў вядзе барацьбу супраць «рускага свету», сепаратызму і імперскасці, сімвалам якіх стала георгіеўская стужка падчас вайны на ўсходзе Украіны і акупацыі Крыма.
У чэрвені светлагорская міліцыя зафіксавала блізу дзясятка выпадкаў пашкоджанні аўтамабіляў з георгіеўскай стужкай. Невядомы пратыкае шыны ў аўто, а на адной з машынаў нават паскакаў, моцна пашкодзіўшы кузаў.